Dia 11 di april benidero, e organisacion Parkingson Aruba, ta bay tin un caminata. Motibo principal ta pa recauda fondo y pa trece tur miembro hunto, pa nan ta activo pa asina drenta den publico, segun Jeanice Arends-Werleman, miembro activo y boluntario den e organisacion.
Nan kier pa tur hende haya sa y no sconde e malesa. Problema mas grandi cu tin na Aruba, ta cu tin hopi hende tin e malesa, pero tin miedo di demostra. Ta hendenan cu por participa activamente den nos comunidad, si nan sigui cu nan tratamento drechi.
E caminata ta costa 10 florin pa ticket. Muchanan bao di 12 aña ta gratis. Ta cuminsa na Brandweer na Camacuri, ta cana bay abao, yega via Linear Park te na cas di gobernador. Eynan ta bira bay ariba, bolbe caba na unda cu a cuminsa.
Arends-Werleman a sigui splica cu tur hende por participa. Tur e miembronan cu ta den e organisacion tambe lo ta bay t’ey. Tur atleta cu tin na Aruba, tur hende cu kier, bo mag cana, core, etc. Claramente e pashentnan ta bay tiki mas poco poco, pero tur hende por participa.
Organisacion Parkingson Aruba, ta invita cordialmente henter pueblo di Aruba pa bin participa na e caminata dia 11 di april y ta mas cu bon bini pa yuda e organisacion y tambe tur e pashentnan.
