Diabierna 28 di februari, ATIA a presenta e resultadonan di e aña anterior y e enfoke pa 2020 y alabes a eligi e miembronan di e hunta di directiva pa aña 2020 – 2021.
Durante 2019, e reforma fiscal tawata un di e temanan cu tawatin hopi atencion di parti ATIA. Recomendacionan a wordo scirbi y manda, reunionan y conferencia di prensa a wordo teni y tur tawata parti di e esfuerzonan di ATIA pa comunica y purba di influencia gobierno su decisionan encuanto e reforma fiscal necesario pa bienestar di no solamente comercio pero Aruba su comunidad en general. Ademas di e tema aki, ATIA tawata envolvi tambe entre otro den temanan laboral por medio di e Dialogo Tripartite Social Laboral, temanan actual manera e problematica di migracion indocumenta, maneho di desperdicio, etc.
Tambe ATIA a sigi enfoka durante e aña riba desaroyo di e habilidadnan y expertisio di su miembronan y nan empleadonan por medio di diferente workshops, sesionan di informacion y eventonan pa engrandese e network di miembronan di ATIA.
Pa aña 2020 – 2021, e hunta di directiva a wordo reinforsa cu un miembro nobo den persona di Sr. Jurgen Benschop. Lamentablemente, Sr. Jeannot de Cuba pa motibonan di trabouw, mester a bandona su puesto den hunta di directiva di ATIA. Sr. de Cuba a fungi como presidente di e hunta durante 2019 – 2020 y ATIA ta gradisi Sr. de Cuba su aporte valioso durante su aña di presidencia. E presidente nobo, lo wordo eligi durante e prome reunion di e hunta durante e luna di maart.
E hunta di directiva di ATIA pa 2020 – 2021 ta consisti di: Sr. Ronnie van Trigt, Sr. Tito de Cuba, Sra. Tisa LaSorte, Sr. Roland Croes, Sr. Donald de Veer, Sr. Tristan Every, Sr. Mattijs Bijen, Sr. Frank Snijders, Sra. Mireille de Miranda y Sr. Jurgen Benschop.
Despues di e parti oficial, Sr. Raymond Maxwell a trese un presentacion interesante riba e tema di innovacion y kiko e motibonan ta cu hopi biaha innovacion ta fracasa den un organisacion. Esaki por tin di haber cu entre otro e parti di maneho, e cultura di e organisacion pero tambe e incomprension entre diferente generacionan trahando den un compania. E presentacion a activa un discusion hopi dinamico entre esunan presente.
E atardi a clausura cu un networking event, caminda e miembronan por a conbersa den un ambiente agradabel.
