Awe mainta Minister mr. Andin Bikker a anuncia cu, den cuadro di e ley di VISA di Reino Hulandes, a logra pa introduci VISA pa tur Venezolano cu kier drenta Aruba. Ta haciendo cambio tambe den nos “Legesbesluit” pa un formula estilo ESTA tambe pa Venezolanonan. Esaki a causa toch bastante pregunta, specialmente di Venezolanonan residencia na Aruba, cu permiso, puntrando si nan tambe mester VISA of ESTA ora di biaha.
E mandatario a confirma cu Venezolanonan bibando of trahando na Aruba lo NO mester un VISA. El a aclaria cu un VISA of ESTA ta basa riba un estadia cortico “Kortverblijf”, dus un permiso pa por biaha como turista. Ora Bo ta un Venezolano cu permiso di estadia y/of trabou na Aruba, ta duna Bo e derecho pa por keda pa periodonan mas largo riba nos isla y como tal no ta necesario un VISA.
Den e proximo simannan lo informa riba e cambionan aki, cu sin duda lo tin su impacto pa cu Venezolanonan biniendo Aruba. E cambio den nos sistema ta pa turistanan Venezolanonan cu kier bishita Aruba pa algun dia, te cu un maximo di 30 dia so. E formula nobo ta duna oportunidad pa autoridadnan revisa e peticionnan di VISA adelanta pa verifica cu e Venezolano encuestion ta bin Aruba pa vakantie of si e tin otro intencionnan.
