fbpx
December 07, 2022

Entusiasmo grandi pa festival “Un Canto pa Aruba su Himno y Bandera Infantil-Hubenil 2020”

Share on Facebook
Share on Whatsapp
0
0
Entusiasmo grandi pa festival “Un Canto pa Aruba su Himno y Bandera Infantil-Hubenil 2020”
Entusiasmo grandi pa festival “Un Canto pa Aruba su Himno y Bandera Infantil-Hubenil 2020”

E fecha ta acercando pa celebracion di nos Dia Nacional y como tal nos musiconan tambe ta poniendo nan maximo esfuerso y inspiracion pa presenta lo miho na e pueblo orguyoso cu composicionnan nobo y patriotico. Robert Maduro y su Alma Folklorico ta un idolo musical cu hopi aña di trayectoria, exito y piesanan inmortal y representantenan digno di nos musica cultural. Den combersacion cu Robert Maduro el a conta riba e ensayo y coordinacion pa locual ta e festival na caminda.

Nada facil pa traha y hinca cancion den otro mirando cu ta traha cu diferente compositor y areglista, pero exitosamente a logra diahuebs anochi concretisa tur shete participante tanto infantil como hubenil cu lo participa den e Festival di un Canto pa Aruba su Himno y Bandera.

Mester bisa cu tur musico, areglista, compositor cu a pone di nan parti y a haci esfuerso y pone nan “input” pa logra cu satisfaccion un resultado final pa presenta lo miho cu cada mucha cu lo ta participando.

Na e pregunta cuanto titulo maximo tin pa Alma Folklorico, tabata poco dificil pa yega na e contesta mirando cu a gana asina tanto den diferente categoria. Logronan cu sigur ta danki na tur cu ta depositanan confiansa y ta pone nan curason pa canta pa nan pais manera entre algun cu ta bin na mente, Ceasar Olarte, Daryanne Castaner, Deidre “Didi” Rodgers , Sharon Rose, rumannan Henriquez, Jonathan Croes y sigur varios den categoria infantil/hubenil tambe cu titulo maximo.

Alma folklorico semper ta un di e agrupacionan cu e publico ta en espera di dje, expectativa ta grandi pa wak kico ta bin cu ne. Na momento di subi escenario nan sa cu alma Folklorico no ta bay pa participa, ta bay pa competi. Ta un palabracion di incicio cu cualkier persona cu lo ta desea di participa cu Alma Folklorico cu ta bay pa competi y ta traha duro p’e.

Hopi biaha competencia ta duna su fruto. Na momento cu pone dedicacion por spera premiacion y ta locual cu semper ta trahe p’e, ta locual Robert Maduro a bisa.

Pa finalisa Robert Maduro a enfatisa cu Dia Nacional ta na caminda y como Arubiano, ta duna aporte y celebra como un dia hopi importante y no solamente pa e Himno y Bandera pero tambe e escudo, cultura, folklor, tradicion, custumber como Arubiano. Poco ta e paisnan cu ta celebra den forma cu nos ta celebr’e.

Mirando tambe cu aña pasa lastimamente a perde e co-autor di nos Himno Nacional cu ta Padu Lampe, ta pone cu e aña aki e lo bira un celebracion aun mas special. Alma Folklorico lo dedica e presentacion na dje, tanto e presentacion di e muchanan diabierna como e grandinan na memoria di nos Tata di Cultura. Un persona cu semper a brinda su sosten incondicional na Alma Folklorico y como baluanrte ta digno di reconoce y aprecia durante e celebracion di un Canto na nos Himno y Bandera.

Conseho na nos hubentud:

Stima boso folklor, boso cultura, stima boso tradicionnan, participa pa engrandece y corda cu cada hoben ta e caminda y futuro cu lo carga nos cultura den nan man y tin cu gara e bandera (e bandera di folklor, custumber y tradicion ) y sigui cu ne pa nos tin cultura pa rato.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.