Dialuna cu a pasa den un rueda di prensa di Gobierno, Minister di salubridad Publico, Dangui Oduber, hunto cu prome minister Evelyn Wever-Croes, a anuncia publicamente e Expression of Interes. A splica cu Gobierno a publica un documento den medionan di comunicacion, unda tur esnan cu tin interes pa desaroya un pilar economico di cannabis medicinal, sea cultiva, planta y exporta, por expresa nan interes cumpliendo cu tur e rekisitonan.
Gobierno a stipula 21 condicion cu tur grupo mester cumpli cun’e na momento cu nan kier cuminsa explora tipo di negoshi aki. Gobierno ta den proceso pa cambia e ley di Landsverordening Verdovende Middelen. Esaki a bay DWJZ. Despues e lo mester bay Raad van Advies y finalmente debati den Parlamento pa haci’e posibel cu por exporta cannabis pa traha e producto final medicinal.
Pa por haci esaki Gobierno mester institui un departamento nobo, un Bureau Medicinal Cannabis, cu lo bira e instituto oficial di gobierno cu por exporta loke ta wordo produci na Aruba. E produccion lo cay bao di controlnan hopi estricto. Na momento como pais bo kier exporta pa traha e producto final di Cannabis, sea ta un azeta, un crema, un pildo, un capsule di dje, esnan cu ta importa tin condicionnan hopi estricto. Tin cu haci test, tin cu cumpli cu Good Agriculture Practice, etc. y hopi condicionnan estricto prome cu yega eynan.
