fbpx
December 01, 2022

Economia di Aruba lo por crash cu impacto di e medidanan nobo

Share on Facebook
Share on Whatsapp
0
0
Economia di Aruba lo por crash cu impacto di e medidanan nobo
Economia di Aruba lo por crash cu impacto di e medidanan nobo

Tanto medida, cu tanto “ingrijpende gevolgen”, manera Raad van Advies ta adverti gobierno, lo por pone economia di Aruba crash. Esey ta evidente for di e descripcion di e comentario di Raad van Advies riba practicamente tur e medidanan cu Gabinete Wever Croes a presenta na Parlamento na e momentonan aki como parti di Presupuesto 2020.

Raad van Advies ta papia di impacto negativo riba comercio, poder di compra, turismo y nos clima di inversion. Esakinan practicamente ta tur e facetanan di economia di Aruba. Si tur e facetanan aki wordo afecta asina negativamente den un solo bes, no por conclui nada otro cu defacto Raad van Advies ta adverti gobierno cu e cumulacion di medidanan tuma caba hunto cu e pakete aki por pone economia di Aruba crash!

MEDIDANAN NOBO DI GABINETE WEVER CROES:

• Introduccion di un BBO adicional di 6% riba tur importacion 35 miyon
• Aumento di deviezenprovisie cu 50%: di 1.3% pa 1.9% 25 miyon
• Elimina e tarifa special pa inversionistanan (IPC) e.o. hotelnan 15 miyon
• Lo kita 35% di entradanan di roomtax for di ATA 35 miyon
• Elimina areglo di pensioen interno den empresanan 15 miyon
• Elimina posibilidad di reduccion pa mantencion di edificio 10 miyon
• Forsa companianan di utilidad cumpra nan tereno 30 miyon
• Otorga licencia pa plantacion di cannabis/marihuana 15 miyon
• Belastingdienst lo cobra AZV, SVB y ATA pa su servicionan 10 miyon

Aumento di deviezenprovisie cu 50%; di 1.3% pa 1.9%. Esaki lo mester trece 25 miyon den caha di gobierno:

Banda di e introduccion di un BBO adicional di 6% na frontera, gobierno ta aumenta tambe “deviezenprovisie” cu 50%. Tur ciudadano di Aruba mester paga un asina yama ‘deviezenprovisie’ pa haci transaccionnan den un moneda stranhero. Es decir, pa tur transaccion monetario cu exterior cu bo tin cu cumpra moneda di otro pais. Na momento di haci e cambio, banconan local ta cobra Bo e deviezenprovisie riba e tasa oficial di cambio. E banconan ta pasa e fondonan aki pa Banco Central; y Banco Central ta pas’e pa Gobierno. E deviezenprovisie awor ta 1.3%, pero Gabinete Wever Croes ta aument’e cu 50% te cu 1.9%.

Aruba tin un economia di importacion, como cu nos ta produci masha poco y 95% di loke nos ta consumi aki ta wordo importa. Esey kiermen cu tur cos cu Aruba lo bira mas caro door di e aumento aki, como tambe e BBO nobo na frontera. Tambe tur hende cu ta manda placa afor pa otro motibonan familiar of pa yudansa, tambe lo confronta cu e aumento grandi aki. Tur empresa cu ta paga fiansanan den exterior esaki ta bira un aumento hopi pisa.

E conseho di Raad van Advies ta bisa literalmente:

Kita e tarifa special di impuesto di ganashi (IPC) di Hotelnan; Esaki lo mester trece den caha di gobierno 15 miyon:

Aruba conoce masha tiki incentivo fiscal pa empresanan internacional establece nan mes akinan. Cu e regimen IPC, empresanan internacional cu ta genera hopi cupo di trabou, e.o. hotelnan, tabata paga un impuesto di ganashi di 2% efectivo. Durante Gabinete Mike Eman e regimen aki a wordo amplia pa tur empresa cu tin actividad riba tereno di sostenibilidad, innovacion, economia di conocemento y turismo medico. Eliminacion di e beneficionan fiscal aki ta perhudica nos economia, pero tambe finansas publico riba termino largo como cu inversionnan lo keda atras, no tin perspectiva pa creacion di cuponan di trabou, posicion competitivo di Aruba ta wordo afecta y lo no tin un balor agrega ni tampoco lo genera entradanan pa otro sectornan di nos economia.

E conseho di Raad van Advies ta bisa literalmente:

35% di entradanan di roomtax destina pa e fondo di promocion y mercadeo di Aruba Tourism Authority (ATA)ta wordo pasa pa Gobierno di awor en adelante:

Na momento cu a independisa Aruba Tourism Authority (ATA) na 2011 a reforma e “room tax” di e tempo ey pa un “tourism levy” garantisando un base mas amplio y solido di entrada pa e agencia cu ta percura pa promocion y mercadeo di Aruba. E fondo nan aki ta wordo uza pa explora mercadonan y rutanan nobo pa nos bishitantenan yega nos isla, na momento unda mercadonan existente ta faya. Parti di e fondonan aki ta wordo aloca den Tourism Product Enhancement Fund (TPEF) pa embeyecimento y mantenimento di infrastructura y areanan turistico. Awor Gobierno lo aumenta e “tourism levy” cu 1% y pasa 35% di e fondonan di ATA directamente pa caha di Gobierno sin tene na cuenta e desaroyonan mundial cu por afecta e pilar principal di nos economia. Ademas Gobierno ta propone pa autorisa e Minister di Finansas pa aumenta e percentahe aki sin pasa e trayecto legislativo y Parlamento (via Ministeriele Regeling).

E conseho di Raad van Advies ta bisa literalmente:

Elimina posibilidad di reduccion di mantencion di edificio generando 10 miyon pa caha di Gobierno:

Cu e medida aki Gobierno kier amplia e base di winstbelasting y limita e posibilidadnan pa reduccion (aftrekposten). Empresanan no ta wak ningun beneficio na e reduccion di winstbelasting di 25% pa 23%, mirando cu ta limita e aftrekposten y ta elimina IPC-regime. Gobierno ta interpreta e recomendacionnan di IMF eroneamente, pasobra no ta bin cu ningun incentivo pa inversion of pa motiva comerciantenan pa sigui haci negoshi creando mas cupo di trabou.

E conseho di Raad van Advies ta bisa literalmente:

Raad van Avies ta condena e hecho tambe cu gobierno sin un proceso debido kier implementa y impone medidanan asina “rigoreuz”. Nan no tin ningun palabra bunita pa e tempo cortico cual gobierno kier a duna nan pa por a analisa e impacto di e medidanan aki. E mesun preocupacion tin den Parlamento cu a haya unicamente un siman pa studia e Presupuesto 2020 pa haci pregunta.

Nos a compronde cu partido AVP a yama un Partijraad Extra-ordinario pa Dialuna anochi cu su dirigentenan di bario pa determina ki pasonan lo tuma contra di e intencion di gobierno pa impone e medidanan aki.

E interogatorio grandi ta cu si Raad van Advies a duna un dictum asina absoluto cu e medidanan aki lo tin consecuencianan hopi negativo pa Aruba y cu tur e impacto di e medidanan anterior ta vislumbra un crash di economia di Aruba si Parlamento aproba e medidanan feroz aki. Sin duda e conclusie y eindadvies di Raad van Advies mester ta suficiente pa tin un reflexion profundo den Parlamento di Aruba.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.