fbpx
December 07, 2022

Edwin Duijneveld: E tres piscadonan amigonan di Pau Martijn ta deteni pero no encarcela na Venezuela

Share on Facebook
Share on Whatsapp
0
0
Edwin Duijneveld: E tres piscadonan amigonan di Pau Martijn ta deteni pero no encarcela na Venezuela
Edwin Duijneveld: E tres piscadonan amigonan di Pau Martijn ta deteni pero no encarcela na Venezuela

Edwin Duijneveld ta consehando y siguiendo di cerca loke ta e tres Arubianonan, cu na e momentonan aki ta na Venezuela, despues cu nan a sali y bay busca drechi di Pau Martijn y señalnan cu lo a drenta for di area di Venezuela y Colombia na frontera.

A menciona cu nan tabata banda di Castillete. Ta papia cu a detene nan. Diferente informacion riba caya, pero awe, den un forma oficial, Edwin Duijneveld a splica Aruba kico ta loke a sosode cu e tres personanan aki. E tin e contactonan cu Venezuela, e ta representa e famia na Aruba di e piscadonan aki cu a sali pa busca drechi di Pau Martijn den direccion di Venezuela cu Colombia.

Sigur nan ta na bida, segun Edwin Duijneveld. Door cu tres cabayeronan aki a keda pega na Venezuela y a dicidi pa laga sa kico precies ta pasando pa evita cu tur e rumornan ta sigui y rumornan cu absolutamente tin di nan cu no ta berdad y hasta por haci daño na e tres personanan aki.

Lamentablemente Pau Martijn ta perde riba lama pa un tempo caba y for di diadomingo caba, a tende cu lo a haya un curpa cu tabata drief dilanti di costa di Colombia. Nan a dicidi di bay wak kico ta kico y si di un of otro forma, yuda nan amigo y e famianan di Pau Martijn.

Pero ora nan a sali dialuna mainta, dado momento nan a yega dilanti loke nan a kere cu ta costa di Colombia, banda di Castilletes. Eynan lama tabata basta bruto. Un piscado a guia na paden. Ora nan tabata paden, nan a wordo ricibi hopi bon pa e piscadonan. Nan a haya cuminda, nan a sinta combersa, nan a haya un telefon pa bisa famia na Aruba cu nan ta bon.

Pero dado momento Guarda Nacional di Venezuela a yega riba nan y eynan a ripara cu nan no ta na Colombia, sino na e parti di Castilletes di Venezuela. Logicamente eynan a wordo cuestiona y mester a clarifica dicon nan ta eynan y kico. A detene nan pero nunca a wordo cera. Nan no tabata por a move di e luga. Dado momento investigacion a wordo haci riba e boto pa droga, cual a sali bon. Logicamente nan no ta bay haci nada di eseynan. Eynan nan tabata cla cu Guardia Nacional y nan tabata wak si nan por a bay bek Aruba cu boto.

Tramitenan mester a tuma luga, mirando cu nan no por a regresa. Nan a wordo entrega na Guarda Costa. Nan mester a bay Maracaibo, mirando cu nan a wordo avisa cu nan mester wordo scucha apart. Diabierna laat, a mira si por a bay Maracaibo, pero esey no a tuma luga.

Diasabra a bay Maracaibo. Un di nan a bay riba nan boto cu dos hende di Guarda Costa di Venezuela y dos di nan a bay riba e voto di Guarda Costa. Una bes eynan, nan a wordo interoga un biaha mas separa, pero ningun momento nan a wordo deteni. Nan ta den libertad y nan por move.

Sinembargo, nan ta indica cu nan no kier bay Aruba sin nan boto. No kier lage atras zomaar. Cierto tramitenan tin cu tuma luga, mirando cu e frontera entre Aruba y Venezuela oficialmente ta cera.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.