fbpx
December 04, 2022

New York ta declara estado di emergencia cu 76 caso di coronavirus

Share on Facebook
Share on Whatsapp
0
0
New York ta declara estado di emergencia cu 76 caso di coronavirus
New York ta declara estado di emergencia cu 76 caso di coronavirus

Gobernador di New York, Andrew Cuomo, a declara diasabra estado di emergencia den e region aki di Merca pa enfrenta e expansion di coronairus, cu a afecta 76 persona, dies di cual ta hospitalisa. Esaki segun un publicacion di EFE.

“E declaracion di emergencia ta duna nos cierto poder,” Cuomo a splica den un rueda di prensa, cu lo uza pa cumpra producto y contrata mas trahado di salud pa yuda autoridad local.

Den e rueda di prensa, Cuomo a anuncia e prohibicion di bishita centronan di hende grandi den e municipio di New Rochelle, situa den e condado di Westchester, nort di e ciudad di New York, y e luga unda cu a registra e mayor cantidad di caso.

E gobernador a splica cu despues di e aparicion di 21 caso nobo, tin 57 persona afecta na Westchester, diesun di nan a wordo detecta den e ciudad di New York, cuater den e condado di Nassau, dos na Saratoga y dos na Rockland.

Den e zona di New Rochelle, mas of menos 10 kilometer nort di New York, a extende e cierre di scolnan cu a wordo clausura e siman aki, pa purba contene e expansion di e virus di Wuhan.

“Ta obvio cu nos tin un problema cu e foco di Westchester,” e gobernador a reconoce.

Tambe el a adverti cu tabata tin caso di personanan bao di cuarentena preventivo cu a sali for di nan cas, aumentando e riesgo di contagio dentro di e comunidad.

Den e sentido aki a pidi pa hendenan respeta e tipo di confinamento aki y adverti cu por tuma medidanan di siguridad pa respeta e ordennan di aislamento.

Riba e eventual cancelacion di evento y celebracionnan masivo, el a sigura cu e no ta premira ningun cancelacion, aunke el a recomenda pa hendenan cu factornan di riesgo manera hendenan grandi, pa nan abstene pa bay na e concentracionnan aki.

Tambe el a mustra cu a reporta keho pa e aumento di e prijsnan di productonan relaciona cu e prevencion di coronavirus y a sigura cu polis ta studiando e casonan aki.

Den su intervencion, el a adverti comerciantenan cu e lo retira nan permiso di benta den caso cu nan demostra un aumento abusivo di prijs di productonan manera desinfectante di man of mask.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.