Awe pa 4:01am, Centro di Alarma na Cuerpo di Bombero a haya melding di un cas na candela na Rooi Koochi. For di ora cu e yamada a drenta, e prome dos unidadnan di Brandweer a yega e cas den 7 of 8 minuut y a cuminsa prepara pa combati e candela. “Pero nos a bin haya e cas full na candela, pues cu vlamnan saliendo for di tur bentana”, asina Ferdinand Ponson, Vocero di Cuerpo di Bombero Aruba a duna di conoce awe tardi den un entrevista na Kazerne di Brandweer na Tanki Flip.
Locual cu e Bomberonan a haci e ora ey ta pa sigura cu e candela no por expande y no lo afecta e casnan den banda. Den 10 pa 15 minuut nan tabatin e candela domina, evitando expansion y mas bien e ora a inicia cu loke nan ta yama “nablussen” pa por a paga tur e pida pida candelanan tur rond.
Mirando e magnitud di e candela y e forma rapido con el a expande den henter e cas, mester a tene extra cautela y a reenforsa medidanan di siguridad pa e Bomberonan. Den casonan asina e peliger pa e dak basha bin abou ta hopi grandi, pa cual ta evita e ora pa combati e candela den e cas, sino mas bien ta scoge pa combati’e di pafo.
“Ta henter e cas a haya daño. Nos no por a haci nada pa scapa nada di e cas. Pasobra nos a yega hay’e den lichterlaaie, haciendo dificil pa salba cualkier parti di e cas”, segun Oficial Ponson a splica.
Mas leu el a confirma cu Bomberonan na e sitio tambe a tende cu posiblemente por papia aki di un candela intencional. “Esaki ta keda awo den man di Polis pa investiga esaki. Informacion cu nos a haya ta cu e señora doño di cas a laga un porta habri pa un mascota por drenta y sali e cas, pero ta menciona cu a haya bentana y un porta di patras habri”, segun e vocero di Cuerpo di Bombero.
