fbpx
December 06, 2022

Piscado Dechi Bislip: Mi ta bay Bajo pero ultimo tempo cu miedo

Share on Facebook
Share on Whatsapp
0
0

Mario Girigorio Bislip, miho conoci como Dechi, ta un futbolista pero tambe un piscado bon conoci aki na Aruba. E ta manera pisca den awa, nan ta bisa ora menciona nomber di Dechi.

Awe cu su casi 70 aña, Dechi ainda ta subi lama. Pero “ultimo añanan mi tin masha miedo di bay Bajo, mi tin masha miedo di perde,” el a bisa den combersacion cu 24ora.com

Piscado Dechi Bislip: Mi ta bay Bajo pero ultimo tempo cu miedo

Piscado Dechi Bislip: Mi ta bay Bajo pero ultimo tempo cu miedo

Posted by 24ora on Monday, March 9, 2020

Bajo ta un area hopi conoci bou di piscadonan, un area rico na pisca, cu ta hala atencion di piscadonan di tur rond, pero un luga peligroso tambe. “Bajo ey ta bay ranca mas hende. Si bo perde eynan, si no haci un esfuerso pa bati alarma mesora, y laganan oranan pasa, bo ta mas perdi cu perdi,” e piscado cu casi 60 aña di experencia a conta.

El a conta cu e mes tin experencia di a perde un compañe hopi aña pasa na Bajo, pero e ta corda cu asina tabatin 10 minuut cu e mester a subi y e no a mir’e, mesora el a bati alarma cerca tur autoridadnan concerni. “Casi 20 boto a sali mesora  y a nabega na liña bin ariba y asina a topa cun’e. A logra pasobra mi a notifica mesora cu tin un piscado perdi. Mi no a duna chens pa drif bay dos of tres miya leu prome cu mi a meld. Mi no sa kico esnan cu Pau a haci, pero nan mester a meld mesora cu el a perde pa tin speransa di por hay’e. Cu e lama grandi ey, un boto mes ta pasa band’i bo y si bo no paga tino, bo no ta mir’e. Pio cu lama halto.”

Dechi ta corda e diasabra cu Pau a perde hopi bon, pasobra e mes a subi lama e dia ey y tabata den e bisindario. E ta corda cu el a pasa panort di nan y a mira dos boto pasa eybanda. “Nan a hasta hisa man pami,” e ta corda. El a keda te atardi y un poco despues di 5’or el a cuminsa coy rumbo pa Aruba bek. E tabata na mas o menos 2 miya for di Pau y su amigonan. “Ami a bay pisca, mi no a bay tira,” el a conta.

Pau ta un bon amigo di Dechi y ta corda cu diferente biaha nan a subi lama hunto, tambe cu Japi Werleman. Hasta un biaha a perde Japi pa un rato for di bista, pero manteniendo calma e amigo a logra haya nan bek basta lihe. “Awa tabata duro e dia ey y nos a baha malo. Ora cu nos a lanta bek, Japi tabata hopi pazuid. Pau a bay den panic y a cuminsa grita. Pero mi a logra calm’e y a bis’e cu si e grita e homber ta leu y no ta scucha nos. A hisa e scopetnan den laira y asina Japi a haya sa unda nos ta. Si e no a mira nos e dia ey, nos tambe lo a perde bay. For di e dia ey nos lo no t’ey mas.”

Esnan cu ta keda den boto mester tin hopi experencia, pasobra nan mester percura pa bida di esun cu ta den awa. Si bo perde e diver, mester wak unda e awa ta bay y corda cu “lama ta hibabo hopi lihe. Si e biento ta dos knot pa ora, den un ora bo ta drief bay dos miya leu sigur.” Esun cu ta bay wanta boto mester ta hende hopi serio y vigila e awa continuamente. “Si nan perdebo, bo ta bay pasa duro.”

E situacion di antes tabata hopi mas dificil cu awendia. Antes no tabatin Warda Costa, Radar ni radio. Awendia tin tur e cosnan ey. Antes bo por keda drief bay te ora cu dal den Panama. “Ami no kier keda den awa cu live vest, pasobra bo ta mita morto. Si awa ta bon bo por wanta na boei, pero si awa ta malo bo no ta want’e hopi.

Mi no ta “take chance” cu nada. Ultimo tempo mi tin hasta miedo di perde. Ultimo mi a perde na cabes di Aruba, pero mi no a worry pasobra tabata hopi cerca. Coriente ta bay zuid y ora mi a yega basta pazuid, e awa a hib’abou, banda di seabird e coriente a bin aden. Pues a hay’e rapido. “Bajo mi ta bay ultimo tempo, pero cu miedo. No di awo, pero di hopi aña caba. Ultimo tempo mi no ta tira mas, pero ta pisca of coy kreeft.”

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.