fbpx
November 29, 2022

Presentacion oficial di e buki “damnatio ad bestias” na Biblioteca Nacional Aruba

Share on Facebook
Share on Whatsapp
0
0
Presentacion oficial di e buki “damnatio ad bestias” na Biblioteca Nacional Aruba
Presentacion oficial di e buki “damnatio ad bestias” na Biblioteca Nacional Aruba

Autor local sr. Vivienno “Vi” Frank Jr. ta presenta su prome buki titula ‘Damnatio ad Bestias’ diahuebs 12 di maart proximo, pa 7:30 di anochi, na Biblioteca Nacional Aruba na Playa. Portanan ta habri 7or di anochi y entrada lo ta gratis pa publico, un y tur ta bon bini.

‘Un bestia unico, cu por hari y mata su prohimo p’un florin’. Esaki ta e subtitulo di e buki ‘Damnatio ad Bestias’ cu cual sr. Vivienno “Vi” Frank Jr. ta haci su debut cu ne como escritor. Un buki skirbi den idioma Papiamento, y cual muy probabel lo ta un primicia den literatura Arubiano na Papiamento, ya cu aki nan ta trata di un thriller solamente pa adulto completamente di origen propio di Aruba; e eventonan ta tuma luga na Aruba, y e ta skirbi na Papiamento di Aruba door di un autor Arubiano. Te con leu cu ta conoci, buki(nan) pa adulto di e indole aki na nos idioma ainda no ta existi. Por bien ta cu den e caso aki por papia di un genero nobo na nos isla: ‘Thriller Crioyo’.

Anselmo Zievinger, conocido maestro di school, escritor, filosofo y baluarte nacional, ta muri un morto sumamente cruel … Un persona ta dicidi di haci un denuncia publico cu aki no ta trata di un morto natural, si no di un crimen premedita. Hopi na Aruba ta descarta e denuncia aki como algo emocional. Sinembargo, otronan si ta dicidi di busca drechi kico tin di berdad den e denuncia aki. E secretonan cu nan lo descubri ta di un indole asina hororoso, cu nan lo inicia sucesonan cu lo laga e isla completo den shock.

E buki cu titulo “Damnatio ad Bestias” – traduci libremente fo’i Latin: ‘Condena n’e Bestianan’ – por wordo clasifica na Ingles como un ‘Psychological Crime Horror Thriller’, un thriller psicologico criminal cu elementonan di horor den dje. E titulo na Latin ta relaciona n’e evento di mesun nomber den Roma antiguo caminda Cristiannan, y otro nan condena na morto, tabata wordo tira den arena di Colosseum yena cu bestianan salvahe.Kico ta defini un thriller? Kico ta e diferencianan den su sub-genero nan? Kico ta e diferencia entre teror, horor, y suspenso? Pakico a scoge e titulo aki, y pakico na Latin? Tur esaki y mas por haya sa n’e charla cu Vi Frank Jr. lo tene diahuebs 12 di maart proximo, cuminsando pa 7:30 di anochi, na Biblioteca Nacional Aruba na George Madurostraat 13, caminda lo tin e placer pa Vivienno “Vi” Frank Jr. en persona presenta su buki debut, un thriller psicologico criminal titula ‘Damnatio ad Bestias’. Portanan di Biblioteca  Nacional Aruba lo habri pa 7’or di anochi y entrada lo ta completamente gratis pa publico. Mirando e capacidad limita di Biblioteca Nacional, ta conseha un y tur pa ta presente tempran pa por haya un luga pa sinta adecua.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.