Awe mainta na momento cu e barco crucero MS Braemar, di e linea crucero Fred Olsen, a yega Corsou, no a permiti ningun pasahero baha.
Esaki tabata un decision tuma door di Ministerio di GMN, despues cu e liña crucero mes a notifica autoridadnan na Corsou, cu nan tin 3 tripulante y un pasahero abordo cu un probabilidad di tin Corona vírus.
E expertonan di GMN a subi e barco y a haci testnan necesario. Nan a tuma e muestranan bisti completamente segun protocol di siguransa. E compania di crucero ta paga tur gasto mara na e investigacion di laboratorio. Ningun otro hende, cu no ta e profesionalnan di GMN, lo subi e barco. E barco ta sali di Corsou awe mes.
E liña di crucero mes a bati alarma, ora un hende cu tabata abordo recientemente, a test positivo pa e vírus, un par di dia despues cu a desembarca. Den e dianan cu a pasa, 4 hende cu ta riba e barco aworaki, a cuminsa haya sintoma di COVID-19. Por lo menos un di nan tabatin contacto cu e persona kende a test positivo.
