Aruba Food & Beverage Association ta hopi preocupa cu e situacion reinante di coronavirus. Ya caba nan a cuminsa sinti e efectonan y si Gobierno introduci awo tambe un otro parti di Reforma Fiscal, e lo ta devastador pa economia di Aruba.
Presidente di organisacion AFBA Jan van Nes a cuminsa pa mustra su confiansa den e Protocol y otro procesonan di Departamento di Salubridad Publico, y tur preparacion pa combati coronavirus (Covid-19). Sinembargo no por tapa wowo cu loke ta pasando aworaki cu e virus cu ta plamando rond mundo, sin cu el a yega Aruba ya caba e tin su efectonan riba e isla cu cancelacion na diferente hotelnan cu lo tin consecuencia menos bishita na restaurantnan tambe.
Aruba Hotel And Tourism Association (AHATA) a sinti e efectonan caba den lunanan di januari y februari, mientras cu restaurantnan tambe a cuminsa sinti. “E restaurantnan ta hopi preocupa y e unico cos cu nos por haci ta pa duna e miho servicio. Ya caba den e prome dies dianan di maart a sinti e caida y nos ta tumando e situacion dia pa dia, sperando cu e lo no bira pio. Pero pensando realisticamente, mi ta kere nos ta bay haya sla adicional pa resto di e luna aki,” van Nes a expresa.
Specificamente den su caso, van Nes a bisa cu nan a informa nan empleadonan con pa suminsitra informacion na e huespednan pero tambe a splica nan con tin pensa di enfrenta e situacion aki, cu no ta algo cu ta den nan man. “Mester traha pa wanta e slanan y awo no mester gasta den cosnan innecesario. Tin restaurantnan cu ya ta operando cu dos of tres dia off. Si bo no tin cliente, no tins ervicio pa duna. Mi ta mira cu e problema aki lo sigui y lo tin restaurant cu lo no sobrevivi, si e situacion continua. Mei y juni ta lunanan di off season, mientras cu aworaki caba ta sinti un situacion di off season, e lunanan nos dilanti ta duna hopi di preocupa.”
Reforma fiscal
Pa loke ta e Reforma Fiscal, e ta bisa cu esaki ta e pio momento pa introduci e Reforma Fiscal. Por mira cu tur rond mundo, Gobiernonan ta haci excepcionnan. Presidente di Merca Donald Trump a yuda hendenan afecta, na Europa e hendenan ta haya un “break” pa nan hipoteca, Unon Europeo ta duna excepcion na lineanan aereo cu kier bula menos cu 80% pa no perde nan slotnan.
Tur caminda na mundo, van Nes ta bisa, excepcionnan ta wordo haci pa e comerciantenan por tuma e sla un poco mas miho, na Aruba ta introduci un pakete cu lo tin un efecto devastador pa e economia, e comerciante chikito y pa e restaurantero hunto cu tur esnan cu e ta traha cune. “Mi tin cu bisa cu no tabatin un pio “timing” cu introduccion di e Reforma Fiscal entrante prome di april.”
