Pa Roderich Lopez, kende ta doño di 297 Studio y Massive Brassband International, ta un honor di anuncia cu Massive Brassband ta na caminda pa Orlando. Ta un trabao di 3 aña p’asina logra algo asina importante.
Nan ta biahando dia 16 di maart y dia 18 di maart lo ta tocando den Magic Kingdom, cual ta algo hopi grandi pa nan, esta pa toca den un atraccion turistico asina grandi y famoso. Tabata tin hopi conexion su tras y hopi logistica. “Ta un honor masha grandi mes pa por ta na e luga magico aki.”
Biahando cu nan propio ekiponan
A delibera hopi pa loke ta e ekiponan. Sinembargo Lopez a splica cu nan ta biahando cu tur ekipo. Nan a adapta tur cos pa e dia aki. Esey ta haci cu automaticamente nan ta biahando cu tur nan cosnan.
Cuanto dia
Den Magic Kingdom nan lo ta tocando riba 18 di maart, pa 2’or y mey di merdia. Ta e Prefantasy Parade di Magic Kingdom. Nan lo ta kedando pa 1 siman na Orlando y den e 1 siman ey ta haci’e un vakantie di biaha.
Acercamento
Lopez tin 36 aña tocando den brassband, semper na Aruba y Hulanda y aki el a mira hopi hende cu ta role model. Ta personanan special cu el a acerca pa nan bin aden, entre nan Richard Dirksz, John Hessen y D. Busbey. E fantasia completo pa bay toca den Magic Kingdom, sin nan esey no lo por ta posibel.
Richard Dirksz ta tocando, y tambe ta director musical di e brassband. Lopez no ta kere den un solo persona pa maneha e band. El a haci un proyecto cu esnan antes cu tabata toca y cu tabata significante tambe pa e mundo di brassband.
Richard Dirksz, no ta un persona desconoci pa e mundo di brassband y e ta un di e personanan cu lo ta tocando na Magic Kingdom. E mes a yega di hiba varios brassband den exterior.
Tempo e tabata biba na Hulanda e tabata tin su mesun brassband y a haci hopi tour. A base di esey, Roderich Lopez a acerk’e, mirando cu e sa con e sistema ta bay. Merca lo ta su prome experiencia.
Dirksz tin basta aña di experiencia den diferente brassband. Na Hulanda el a yega di topa Caribbean Brassband, den decada di 80. Despues di esey el a lanta su mesun brassband cu yama Arubian Brassband. Despues cu el a caba di studia, el a laga brassband over pa un amigo di dje y te ainda e brassband ta existi.
Magic Kingdom
Magic Kingdom sigur ta un logro hopi grandi. Tempo cu e mes tabata mucha, el a bishita Magic Kingdom basta biaha. Semper el a sinta wak e marching bandnan y a pensa cu Aruba mester haya e chens pa logra drenta eyden sin pensa cu algun dia e lo a bira un realidad.
Dios ta grandi, el a splica. Y awo ta bayendo den e direccion ey pa otro siman. Esey sigur ta un soño cu Dirksz lo cumpli. Ta algo hopi grandi cu casi 300 scol pa luna ta busca manera pa aplica pa drenta Magic Kingdom y pa drenta no ta facil. Y pio pa nos cu ta un isla asina chikito, ta un logro hopi grandi pa Massive Brassband.
