Awe diaranzon ta un dia masha special na Super Food Plaza, como cu lo yega e suma acumula di 1 miyon florin na donacionnan di cliente pa e Super Food Plaza Cares Program. Super Food kier a gradici tur clientenan cu a haci donacion na e programa aki inmensamente y ta spera di por sigui conta ariba nan cooperacion.
E Super Food Plaza Cares Program a start na oktober 2017, como un programa pa hunto cu clientenan di e supermercado, yuda fundacionnan clave den nos comunidad cumpli cu nan meta. Prome cu esaki, tabata yuda hopi organizacion di forma chikito, pero via e programa aki y cu sosten di e clientenan por yuda na un forma mas grandi y structura pa asina e fundacionnan por ehecuta proyectonan mas grandi y di mas balor pa nos comunidad.
Desde principio di e programa te cu awor, un total di 30 fundacion local a ricibi un donacion, di cual e suma a varia entre Afl. 16.060 te cu Afl. 54.302. Tur luna e Super Food Plaza Cares Program ta escoge un otro fundacion esencial den nos comunidad pa yuda. Clientenan por escoge pa haci un donacion na caha y tur esnan cu duna Afl. 1.75 of mas por participa pa gana un di e 3 premionan semanal. E prome premio ta un gift card di Afl. 1.000, segundo premio gift card di Afl. 500 y tercer premio gift card di Afl. 250. Tur premio ta donacion di Super Food Plaza mes y tur donacion di cliente ta bai 100% pa e fundacion na turno. CEDE Aruba ta encarga pa verifica cu tur donacion ta worde usa pa e meta stipula.
Pa celebra e bunita logro aki cu su clientenan, Super Food Plaza a pone dobbel premio disponibel pa e resto di sorteonan den luna di Maart. Cu otro palabra, tur dialuna di e luna aki lo rifa 2 gift card di Afl. 1.000, dos di Afl. 500 y dos di Afl 250. Diaranzon ta regala un cupcake na cada cliente cu haci donacion (mientras tin stock)na e Super Food Plaza Cares Program, cu e luna aki ta sosteniendo fundacion Bon Nochi Drumi Dushi.
Pa finaliza, Super Food Plaza kier bolbe gradici pueblo di Aruba pa e tremendo sosten duna na e programa aki. Hunto nos ta yuda mehora e comunidad cu nos ta forma parti di dje.
