E dos damanan cu diadomingo tabata envolvi den un accidente na altura di ex- Drive-Inn awor ta ser busca pa Warda Nos Costa pa deporta. Ambos ta ilegal! E chauffeur sin rijbewijs Samantha Nadiuska Santana Marquez naci na Venezuela 11-7-1987 y conoci como Carolina di “Patruya 37” diamars a tende cu e no ta haya asilo. Nan a haya un “NO” diamars riba nan peticion pa Asilo. Ta peticion haci despues cu nan a cana varios luna illegal riba nos isla.
Samantha Nadiuska Santana Marquez ta expone su mes como “La Poderosa” riba rednan social. Dia el a yega Aruba a haya 30 dia di estadia y awor tin casi un aña ta cana rond y ta basta den noticia. Definitivamente a keda demostra cu e no mester di asilo y mas bien ta burlando di e sistema. Derecho of no, e peticion di asilo tin su motibonan y den e caso aki e no ta aplicabel pe.
Luzmary Nohemy Irasuquin Montes tambe ta naci na Venezuela dia 23 di November 1990. E tambe a keda deteni diadomingo. Hunto cu e chauffeur bebi a lage bay liber. E tambe a yega Aruba y haya dos dia pa keda. El a bin riba un vuelo for di Corsou. Nunca mas el a sali y e luna aki ta bay haci un aña na Aruba.
Mescos cu Nadiuska, Luzmary tambe a haya un “NO” diamars riba su peticion di asilo. Un caminda a faya na DIMAS. Nan a djis bisanan “NO” y laga nan bay. Mester a prepara Warda Nos Costa pa hibanan mesora. Esey no a sosode. Awor a yamanan bek parce Diaranson pa nan bolbe y ta resulta cu awor no por haya nan.
E mesun damanan cu despues cu nan a sali di Warda nos Costa y riba nan trip a hasta chuercha di nos autoridad. A retanan pa mira ken por sacanan for di Aruba pasobra e ta “La Poderosa”.
