E incidente di ayera merdia na altura di Moomba Beach ta hayando un rabo largo. Famia di e victima ta reclama cu doño di e negoshi ta purbando tur forma pa laba man y no para responsabel pa su trahado, cu a resulta gravemente herida y mester biaha urgente pa Colombia. E homber no tin ni paspoort y no ta sigura ningun caminda, segun famia ta denuncia.
Manera ta conoci tabatin un accidente na trabou banda di Moomba Beach of Hadicurari. Eynan un persona a sufri heridanan serio ora cu e tabata bezig cu un tanki di oxigeno pa buceo. Ta trata di Mario Maduro cu ta traha zwart y ta un persona homeless. E ta biba riba caya pero ta traha y yuda tur dia na e watersport di Palm Beach Divers.
Awor a resulta cu aunke e ta traha, no tin’e sigura ni nada. E doño di watersport a keda di topa pa regla e asunto di paspoort y paga esaki. Mario Maduro ta bay sali urgente cu air ambulance mainta pa Colombia y haya tratamento. E ta for di tino cu hopi dolor. E ta riba morfina.
Awor cu ta preparando pa manda Mario Maduro afo, ta resulta cu doño di e watersport kier laba man. E doño di Palm Beach Divers yama Robin Zwaan. E comerciante a bisa famia cu e no ta banco. El a priminti mas trempan na Hospital cu e lo regla paspoort y AZV etc. Anochi el a yama e famia y bisa cu e no sa pakico mester yuda pasobra e no ta banco.
Dokter a bisa caba cu Mario Maduro no ta bay cana mas. El a kibra su weso di lomba bay full abou. Un banda di pia tambe ta full kibra y cierto weso di curpa lomba bay abou ta full garna. Mario Maduro ta traha na e watersport y durante cu e tabata trahando un boter di dive a rementa.
Famia ta hopi desapunta. Mario Maduro por ta homeless pero mester corda cu nan tin un mama, ruman y famia. No ta pasobra bo ta mire ta cana rond bo ta uz’e pa traha pa bo y awor cu el a accidenta na trabou ta core laba man. Famia ta yama y e telefon awor ta paga.
Instancianan di gobierno mester atende cu e asunto manera esaki. E famia a yama Polis caba. Ta hopi cla cu Bo no por pone hende traha zwart pa bo. Esaki ta contra ley! Tur trahado mester ta sigura via Svb, sino tin multa pa e doño di trabou y civilmente ta imposibel core pa Bo responsabilidad awo!
