fbpx
December 08, 2022

Minister Dangui Oduber durante reunion den Parlamento: Aruba no tin caso di coronavirus

Share on Facebook
Share on Whatsapp
0
0
Minister Dangui Oduber durante reunion den Parlamento: Aruba no tin caso di coronavirus
Minister Dangui Oduber durante reunion den Parlamento: Aruba no tin caso di coronavirus

Minister Dangui Oduber a wordo invita pa un Reunion den Parlamento pa bin duna un splicacion y comparti informacion kico tur Gobierno ta haciendo den cuadro di preparacion pa loke ta coronavirus.

A bin hunto cu departamento di Salud Publico y tambe Raad van Bestuur di Hospital, a bin cu e crisis coordinator tambe, sr. Rino Hermans y tambe presidente di asociacion di dokternan di cas, pa hunto como team, kendenan ta conseha gobierno riba e medidanan di prevencion kico ta haciendo pa prepara nos mes pa un posibel caso di coronavirus.

Te na e momentonan aki tin cu informa comunidad cu 14 test a wordo haci caba na Aruba pa loke ta coronavirus. Tur e testnan aki a sali negativo. Na Aruba no tin coronavirus ainda. Pero no ta kita e hecho cu nos por haya nos mes confronta cu coronavirus na Aruba.

Esey ta motibo pa gobierno, na un manera un forma habri y transparente brinda informacion na parlamento di Aruba.

El a wordo manda tambe pa comunidad, cu tur hende por a sigui esaki, caminda cu miembronan di Parlamento por haci tur nan preguntanan, expresa nan preocupacionnan pa asina gobierno por informa comunidad di Aruba kico tur ta haciendo.

A prepara hospital debidamente. Nan tin suficiente camber di isolacion pa atende pashentnan cu por tin coronavirus. Personal di hospital a sigui diferente training, a haci diferente simulacro. Protocolnan ta in place, tin suficiente mask pa e personal di hospital. Tin suficiente tanki di oxigeno pa hospital.

Banda di esey, como gobierno a anuncia durante un conferencia di prensa, a setup un centro di diagnostico. Cu esaki kier evita cu pashentnan cu tin sintoma di coronavirus pa bay den oficinanan di dokter di cas y contagia otro pashentnan cu mester di otro ayudo y otro cuido medico. Pa evita cu e persona aki bay Spoed Eisende Hulp, caminda cu nan por contagia otro hendenan cu ta buscando asistencia medico. E intension di e centro di diagnostico pa esnan cu tin sintoma, pa presenta na e centro di diagnostico riba cita pa no bin den contacto cu hende.

Kier evita na tur momento pa e contacto personal wordo evita. Pesey tambe, SVb, a bin cu un procedura pa meld ziek. Normalmente mester presenta riba di tres dia na dokter di SVb. Awor aki tur melding ta tuma luga via telefon so. A anuncia un Centraal meldpunt nummer pa comunidad, caminda cu nan por no solamente yama si nan tin sintoma, sino por contact e number aki, pa cualkier pregunta of preocupacion cu nan por tin.

A percura pa tin un protocol in place pa tur scol, cuminsando for di creche te enseñansa superior, pa tin protocol na su luga. Informa tur cas di cuido di anciano cu ta esnan mas vulnerabel pa coronavirus.

Si mira e mortalidad ta personanan riba 70 aña ta core mas risico si nan hay’e di forma mas severo. Tin cambernan di isolacion. Hand sanitizer a wordo poni caba na tur cas di cuido. Ta instruccion cu gobierno a tuma. E comunidad di comercio a dirigi un carta pa nan pa informa nan riba e importancia di prevencion. Pa tur dunado di trabao pa prepara nan luga di trabao, caminda cu e personal por prepara den cuadro di prevencion, pa asina pone hand sanitizer, y avisonan pa laba man continuamente.

Si ta tosa, tosa den elleboog. Mantene dos meter di distancia di hende si bo ta malo. Den e caso si tin sintomanan di influenza, preferibel meld ziek. Ta spera cu por haya cooperacion di dunadonan di trabao, pa coopera den e periodo cu ta sigui.

Un preocupacion cu AHATA tabata tin, cu kico ta pasa na momento cu tin un turista riba propiedad cu tin coronavirus. Kico ta e protocol cu tin cu sigui por ehempel si wak kico a wordo haci na Tenerife. Nan a shotdown full e hotel. Ningun hende por drenta ni sali. No kier yega na e extremonan ey na Aruba.

Ta pesey ta importante pa tin un protocol in place. Esaki a wordo desaroya hunto cu expertonan, hunto cu ATA, hunto cu AHATA, caminda tur hende ta na altura kico ta e proceduranan cu tin cu sigui. Si tin un turista cu coronavirus, probablemente e lo a wordo importa. Tin extra medidanan di siguridad na aeropuerto y waf. Prome cu e yega Aruba e tin cu manda un health declaration. Aki tin cu señala personanan cu tin sintoma di corona. Nan por haci e testnan on board caba, cumpliendo cu e protocol, si tin persona cu tin coronavirus, ya caba  nos como pais, e cruceronan aki no por mara na Aruba. Nan no por yega. No lo bay acepta ningun barco crucero cu un persona cu tin coronavirus. Ya caba a nenga esun diamars, caminda cu tabata tin persona cu tabata tin indicacion cu tin coronavirus.

A bisa cu no lo acepta ni pa haci test pa nan. A wordo desvia pa Corsou y a bin resulta cu tabata tin seis persona abordo cu coronavirus. Despues cu e personanan aki a wordo getest y a sali positivo, nan a bira tiki mas malo y a pidi asistencia na Aruba. A bisa cu no por duna asistencia pasobra nos mes tin un limitacion di capacidad. Nos ta un isla chikito.

Ta mira paisnan grandi manera Italia, China, Merca, Hulanda, Inglatera ta wordo confronta cu problemanan con pa deal cu e situacion. Algo si cu e profesionalnan mes a remarca ta cu ta hopi positivo cu den e clima cu nos ta biba temperaturanan riba 27 of 28 grado, e virus ta muri hopi lihe. Esey ta hopi faborabel pa nos. Pero no ta kita e posibilidad cu coronavirus por yega Aruba.

Ta cuestion di prepara nos mes debidamente. Tin protocol y proceduranan in place. Conscientisa y informa comunidad riba improtancia di prevencion di laba bo man frecuentemente. Uza Hand sanitizer cu alcohol, no niester den hende, etc. Ta un responsabilidad di nos tur irespecto color politico bo ta representa, Ta un responsabilidad pa tur comparti e informacion pa ta consciente di e consecuencia cu coronavirus por tin pa pais Aruba.

Na Merca caba presidente Trump a pidi senado y congreso 2.5 biyon di dollar. Na Union Europeo nan a pone 30 biyon euro pa deal cu e crisis. Gobierno di Aruba a presenta un presupuesto na parlamento cual tin cu debati riba dje. Den e presupuesto aki tin cu cumpli cu e normanan stipula pa CFT caminda cu mester tin un surplus di 45 miyon, pero den e peticion cu ta bay haci na Gobierno di Hulanda y Parlamento di Aruba pa duna e flexibilidad conforme articulo 23 di ley di LAFT caminda cu den un situacion di crisis, bo por haci un apelacion na gobierno Hulandes pa desvia di e norma.

E crisis aki obviamente mester di placa pa deal cu e crisis. A prepara un plan di contingencia di parti di APA. Gobierno a presenta un fast track economico pa yuda economia. Tambe gobierno ta trahando riba un plan di contingencia den su totalidad. P’esey e minister a haci apelacion na tur politico, tur miembro di Parlamento pa hunto yuda gobierno traha riba un bon plan pa scapa economia di e pais aki. Si mira kico ta e consecuencianan cu coronavirus tin pa economia mundial, toch ta motibonan di preocupacion kico por ta e consecuencia.

Pa Gobierno e salud di pueblo ta bin na prome luga. Mester percura pa garantisa e cuido na nos ciudadanonan pero na mes momento tin cu cuminsa prepara caba pa e efectonan economico y financiero cu e crisis ta trece cun’e.

Ya caba hotelnan a cuminsa haya cancelacion. Un 80% di e hotelnan ya caba a registra cancelacionnan. Buelonan ta biniendo bashi for di Merca. Na Merca na New York, cual ta e estado principal, mas importante caminda cu mayoria di e biaheronan ta bin Aruba, a declara un State of Emergency. Pa loke ta cruceronan Gobierno Mericano a saca un travel warning pa ningun Mericano subi crucero. Ya caba bo por anticipa e embergadura di e crisis aki con serio e por ta pa pais Aruba. P’esey e apelacion a bay na parlamento pa tur duna e cooperacion necesario na Gobierno pa haya e espacio financiero pa por atende cu e crisis aki.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.