Ady Saladin ta un comerciante hopi conoci na waf chikito y e tin su punto di bista riba e crisis di Coronavirus. Di un principio e ta wak cu esaki ta un negoshi. P’e ta un negoshi pa e farmaceuticonan. Cu e virus tey, e tey. Pero e virus ey ta plama rond mundo, mescos cu cualkier otro virus cu nos tin’e pa siglonan caba. Saladin ta haya cu na Aruba mester ta mas cauteloso di locual nos ta papia. Mas nos papia, mas malo e ta pa nos economia y pa Aruba mes. Nos no mester lubida cu awendia nos ta depende di turismo 100%. Ora bo papia di mas, ta hopi malo y pa e economia di Aruba nos mester ta mas trankil, mas calma.
No mester lubida cu aki riba Aruba, nos ta 100 y pico mil habitante y cu nos ta bendiciona door di Dios. Con cu bay bin, si bo pone atencion, nos no mester di drenta den panico pa e virus aki. Te cu asina leu tin dos persona contagia, pero nan a wordo controla door di instancianan concerni. Saladin ta spera cu nada mas grave lo pasa. Menos nos papia di e virus aki riba Aruba, ta miho. Cu nos tin’e, pero mescos cu nos tin e griep comun pa añanan largo. Nos no mester cay den panico.
Cancelacion di biahe
Riba cancelacion di biahe, Saladin ta compronde cu con cu bay bin e ta un impacto rond mundo. Tocante di e cruceronan, claro cu e ta bay afecta e comerciantenan masha hopi mes. E situacion aki ta algo cu tur hende ta manera den un panico, pero no mester, Saladin a menciona. Si cruceronan dicidi cu nan no bin mas pa awo, sigur e lo tin un efecto. Tin cierto incentivonan pa comerciantenan chikito. Saladin a menciona cu tin cu wak cu si loke nan a skirbi e lo wordo haci, cu nan ta bay en berdad yuda e comerciantenan chikito. Te cu awor aki cos no ta dje grave ey, esey referiendo na Coronavirus.
Pa casualidad Saladin a papia cu un taxista, cu sa hopi tambe tocante di turismo cu ta biniendo den avion y el a bisa cu ainda ta sobreviviendo pasobra si por a mira schedule pa e siguiente 17 dianan. Ta spera cu tin un call di 1500 pa 1600 turista pa dia. Ora cu a bin wak bon, riba e lista berdad ta cu nan tin hopi cu a cancela nan vuelo, pero ainda ta sobrevivi. 1500 turista y ainda ta hayando riba 1000 turista, mester ta hopi contento y hopi bon, segun Saladin. Por ultimo el a bisa “Dios ta cu nos”.
