Trudy Hassell den un video publica riba Facebook, a anuncia cu Warda nos Costa a detene e dos personanan cu durante di un par di siman caba tabata haci mofa y burla di Aruba en general, pero tambe di tur esunnan cu ta biba aki, Arubiano y tur e otro stranheronan cu ta bibando legalmente y tur cu ta cumpli cu nos ley vigente.
Durante di algun dia caba, Warda nos Costa cu sosten di Cuerpo Policial tabata en busca di e dos damanan aki y awe mainta Hassell a confirma cu tur dos a wordo deteni y actualmente lo ta den e proceso di deportacion.
Parce cu ambos a purba biaha awe mainta pa Colombia, pero a reconoce nan na balie y a informa Warda nos Costa mesora. A bin detene nan eynan, a bay cu nan paspoort y maletanan. Na Warda nos Costa lo maneha e proceso di deportacion.
Trudy Hassell a informa cu e lo haci un peticion na Minister di Husticia, pa na momento cu e damanan wordo saca for di Aruba obligatoriamente, e ora ey ta bay pone riba e non-wanted list, pa asina garantisa cu nunca mas no lo bolbe bek na e pais cu tanto el a burla di dje y tanto a dun’e toch un sosten na momento cu el a bin Aruba.
Manera tur hende sa, su peticion pa asilo a wordo nenga y esey ta un proceso legal cu a tuma luga corectamente. E momento cu el a wordo nenga, e tabata sa cu e ta ilegal y maske tabata asina, el a sigui burla di nos leynan y nos hospitalidad.
Consecuentemente, Hassell ta contento di anuncia esaki y keda pendiente pa despues duna mas informacion.
