Ademas di gremionan comercial, awe gremio sindical tambe a atende na e reunion cu Gobierno a yama cu caracter di urgencia pa trata e tema di Coronavirus y su consecuencianan. Tanto Hubert Dirksz di Federacion di Trahadonan di Aruba (FTA) como Magaly Brito di Sindicato di Empleadonan Publico y Priva di Aruba (SEPPA), a sali di e reunion toch satisfecho cu ta atendiendo cu e preocupacionnan.
Magaly Brito a sinti cu e reunion a bay den un bon ambiente y e tema trata tabata specificamente Coronavirus, a papia di e preocupacionnan den tur e sectornan (laboral y di comercio). Tur esaki tabata pa e Minister di Laboral por haci su recomendacionnan na su coleganan den Conseho di Minister.
E situacion for di momento cu a anuncia dos caso di Coronavirus, a haci cu e hendenan a bira hopi preocupa. E ta kere cu tin aspecto cu mester tin claridad riba tur posibel scenario y kico pa haci, pa tur hende ta prepara. E ta haya cu mester cana adelanta, principalmente ora cu retironan cuminsa cay. Mas ainda si e grupo aki ta grandi, pasobra e lo trece su problemanan social pa Aruba tambe. “Nos ta contento cu Minister ta tuma nota di e situacion y ta buscando solucion,” e sindicalista a bisa.
E tema di CAFT no ta algo cu a discuti riba dje, pero Brito ta haya cu e tema di finanza mester bini na discusion. Y mester ta preocupacion si hendenan cuminsa perde trabou. P’esey ta importante e trabou awo cu e Minister di Laboral y Asuntonan Social.
Hubert Dirksz (FTA) di su banda a bisa cu e idea di e reunion ta algo cu e ta di acuerdo cun’e, pa pone sindicatonan y doñonan di trabou hunto pa atende decisionnan cu Gobierno y dunadonan di trabou mester tuma den e crisis. Ocupacion di hotelnan a baha drasticamente y lo sigui baha. Tin hotel, segun pronostico, lo baha te na 20% den e dos lunanan cu ta bini awo. Esey lo tin su impacto riba e trahadonan, Dirksz a splica. “Mi ta kere cu den un situacion asina, no mester empeora esaki. Esnan di lomba mas hancho mester duna di nan banda. Tanto companianan manera WEB, Elmar, Banconan mester contribui cu e trahado- y empresanan cu ta den un situacion dificil. Un break di belasting, ta cosnan cu mester tin flexibilidad y comprension di tur banda,” Dirksz a bisa.
Esunnan cu ta cobra salario mas abou cu wordo manda cas, lo trece un problema mas serio. Ya caba tin un comportacion di panico, saliendo gastando placa na compras. Y si perde trabou ta haci e situacion mas serio. E ta haya cu mester yega na un consensus pa decisionnan a corto plaso y sigui vigila e situacion pa loke ta bini. E situacion por dura mas cu un aña y pa recupera bek di un solo pilar economico cu ta turismo, lo ta hopi dificil, segun e sindicalista. Por baha oranan di trabou, pero e trahado no por perde su poder di compra. Pesey WEB, Elmar y banconan mester coopera di nan banda pa ta mas flexibel.
