Aruba Ports Authority N.V. (APA) a haya informacion oficial cu companianan crucero cu ta sali for di Merca boluntariamente a suspende tur biahenan temporalmente riba peticion di Presidente Mericano, Donald Trump. Lamentablemente esaki lo tin un impacto grandi pa APA y Aruba. For di diabierna e notificacion oficial di cancelacionnan a cuminsa drenta na APA y ta premira den curso di comienso di siman cu e otronan lo sigui drenta, entre nan Carnival, Royal Caribbean, Norwegian y MSC. E duracion di e suspension di nan operacion ta varia entre 30 pa 60 dia te awor y ta spera cu esaki por reanuda mas pronto cu ta posibel.
Minister Dangui Oduber den un comentario duna a bisa “esaki ta un golpi fuerte y duro pa nos turismo pero nos por compronde perfectamente e decision aki. Nos economia ta wordo paraliza! Salud di nos hendenan ta bin na prome luga y p’esey tin comprension pa un decision asina aki”.
Pa Aruba, esaki ta nifica cancelacion di varios bishita, sigur mas cu mita di e barconan cu ta yega Aruba ta di e tres companianan ya menciona. Gerencia di APA tambe tin comprension pa e medida aki tuma y ta reuniendo internamente y cu partnernan strategico riba e situacion.
“E crisis aki ta dificil cu nos tur hunto como pais mester bay deal cun’e. Ban nos tur yuda otro, ban cuida otro y ban mustra nos convivencia pa por sali di e crisis aki mas pronto cu ta posibel”, asina Marc Figaroa, Managing Director di APA a comenta.
Pa loke ta otro medidanan, den forma diario ta atende cu e tema di Coronavirus, tanto cu su empleadonan como cu partnernan di e sector aki. Ta haciendo tur cos segun protocol di DVG y WHO pa sigura cu ta limita presencia di Coronavirus na Aruba.
