ORANJESTAD (AAN): E alerta di Minister di Salud di Francia, Olivier Veran, kende a asegura cu bebe ibuprofen y otro remedinan anti-inflamatorio, manera cortisone, por empeora infeccion causa pa coronavirus. E informacion no a tarda den yega den medionan di comunicacion y social.
Veran a bisa cu si hende tin keintura pa bebe paracetamol. Si ya nan a tuma remedinan anti-inflamatorio of tin duda, consulta docter.
Ibuprofen, bendi bao e nomber y varios nomber comercial (manera Advil y Nurofen), ta parti di famia di remedinan anti-inflamatorio no steroid (AINE), remedinan cu por empeora infeccionnan ya existente, cu complicacionnan grandi.
Varios docter a menciona casonan di pashent cu Covid-19 y sin comorbilidad, cu ta den estado grave despues di bebe ibuprofen pa keintura.
Pa e motibo aki, AINE ya no ta worde bendi den boticanan Frances desde 15 di Januari, despues di un advertencia di Agencia Nacional pa Seguridad di Remedi y Productonan di Salud.
Pero, segun Agencia Spaño di Remedi y Productonan Sanitario (Aemps), no tin ningun dato actualmente cu ta confirma empeoramento di e infeccion pa COVID-19 cu ibuprofen of otro anti-inflamatorio.
