Durante conferencia di
prensa Minister di Economia, Xiomara Maduro a haci un apelacion n’e sentido
civico y e responsabilidad mutuo cu nos mester tin ora cu un crisis toca nos pais.
E mandatario a haci un apelacion fuerte na comercio pa no usa e momento di
crisis como oportunidad pa hisa prijsnan inecesariamente.
Gobierno ta bin ta hayando
informacion cu tin tienda ta aumentando prijs di productonan di, entre otro,
hygiena barbaramente. Esaki nan ta productonan cu no ta conoce prijs maximo
pasobra nan no ta den canasta basico.
Pero en bista di e abuso
cu ta wordo haci, desde diabierna TUR tienda cu ta ABUSA di prijs, nan NOMBER
lo wordo EXPONI PUBLICAMENTE p’asina e consumidor por sa na unda ta abusa y na
unda NO MESTER BAY HACI COMPRAS MAS.
Si como consumidor bo topa
cu abuso, sea asina bon di saca potret y pone e nomber y manda esaki via e APP
Control di Prijs p’asina Departamento Economico por bay over na publica e
nomber. Tambe por expone e abuso riba medianan social p’asina mas consumidor
por ta alerta.
For di diasabra control di prijs a wordo intensiva caminda entre 30 pa 35
supermercado a wordo controla, mester bisa si cu un gran mayoria di
supermercadonan ta cumpli y tin algun cu ta abusa di prijs cual a wordo exponi
publicamente.
