fbpx
December 04, 2022

Papiamento y e derecho di autodeterminacion un instrumento esencial pa stimula e propio idioma y fortifica e identidad di un pueblo

Share on Facebook
Share on Whatsapp
0
0
Papiamento y e derecho di autodeterminacion un instrumento esencial pa stimula e propio idioma y fortifica e identidad di un pueblo
Papiamento y e derecho di autodeterminacion un instrumento esencial pa stimula e propio idioma y fortifica e identidad di un pueblo

Scirbi pa: © Quito Nicolaas

Pa Aruba por a haya su Status Aparte den Reino Hulandes, e mester a haci uzo di su derecho di autodetermincacion. E derecho di autodetermincacion ta un derecho ancra den Ley Internacional, den cual ta otorga un pueblo e posibilidad pa pursigui su propio desaroyo socio-cultural y politico-economico.

Cu e resolucion 1514(XV) adopta dor di e Asamblea General
di Naciones Unidas, ta introduci un cambio y transferencia di e derecho externo
p’esun interno di e drecho di auto determinacion. Den esey mester distingui e derecho di autodeterminacion interno for di esun
externo.

Un ehempel di aplicacion di e derecho di
autodeterminacion interno t’e caso di Sikhs nan na India. Debi cu nan ta un
comunidad diferente for di esun Indio, cu nan propio historia, tradicion y
cultura por lo pronto por haci uzo di e derecho interno.

Contrario na esaki conoce e derecho externo
(independencia) cu no a ser otorga, debi cu esaki lo implica un kiebra di e
teritorio Indio pa por funda e ciudad Punjab como nan propio estado.

Den e caso di Aruba, apesar cu nos ta separa di e otro
islanan dor di laman, a opta p’e derecho di autodeterminacion interno. Cu e
escogencia aki a construi un fundeshi solido den Reino Hulandes y aplicando e
derecho interno por traha y engrandece e propio cultura na un forma social, politico
y economico. E base pa cumpli cu e derecho aki y pa tin relacionan amistoso
entre islanan/paisnan, t’e respet mutuo cu mester tin pa cu otro.

Den esaki e terminologia cultura – como parti di e
derecho di autodeterminacion – ta encera aparte di nos musica, folklore,
custumbernan, tambe nos idioma, enseñanza y literatura.

Papiamento

Asina pues Aruba a haya su mes ta pensa – den cuadra di
cultura – cu mester bin cu un Ortografia cu ta refleha e identidad di e
pueblo. 

Despues di a instala un Comision di Ortografia y hopi
deliberacion cu nan conseheronan, Aruba a opta p’e ortografia Etymologico, cu
ta sali for di e origen di e palabra. Y berdad ta ora un persona ta sinta wak
un pelicula Spaño via p.e.Netflix, e por scucha hopi palabra cu nos conoce den Papiamento
of alomenos ta deriva: acelera, cariño, cas, promesa etc. Ademas si evalua e
palabranan inclui den e Vocabulario Ortografico di Papiamento, un mayoria tin
un conotacion cu Spaño.

E hecho cu Aruba a opta p’e ortografia etymologico tabata
uno strategico, den sentido cu den e continente Latino-Americano unda ta papia
Spaño, e Papiamento ta facil pa lesa, compronde y comunica den dje.

Den esaki nos tin di pensa cu nos lo no keda mará pa
semper na Hulanda, pues un dado momento nos tin di mantene relacionnan
comercial y cultural-politico cu e paisnan aki, banda di esnan den Caribe.

Idioma ta un instrumento di e derecho di
autodeterminacion pa expresa y duna contenido na e cultura y identidad di un
pueblo. Como tal e ta un vehiculo esencial den e proceso continuo di construi
un nacion. Di otro banda un idioma por sirbi pa mantene e structuranan colonial
riba e isla, pero den esey e ta ser uza pa domina y controla e mente di e habitantenan. 

E no ta manera antes den tempo di colonialismo cu ta
domina e rikesa di un isla of den tempo di sclavitud cu ta apropia e individuo.
Awendia ta bay pa colonisa via mente y consciencia, mientras aceptando un otro
idioma – cu no t’esun indigena – ta nifica cu lo acepta e cultura, normanan y
ideologia di e idioma cu ke domina.

E discusion na Aruba ta un ehempel clasico, con e
oponentenan ta construi argumentonan pa bagatalisa y stigmatisa nos Papiamento.
Lubidando e balor cultural y e fortificacion di identidad cu esaki ta pa nos
hobennan y generacionan den futuro.

ORTOGRAFIA

E caso di Aruba por ser ilustra cu desde añanan ’70 cu tabata
lucha pa un Status Aparte, e gobernantenan a haya nan mes ta pensa over di e
cuestion di idioma. N’e momentonan aki e islanan ABC conoce dos otrografia,
esta esun Fonologico y Etymologico. E idea ta cu lo mester bin un solo
ortografia y ya caba tin un protocol p’e islanan traha y coopera cu otro pa
yega n’e meta aki. 

Mester apunta aki cu apesar cu na 2018 a firma un
protocol entre Aruba y Corsou, no ta conoci p’e publico e locual a ser logra te
aworaki ni tampoco e puntonan riba cual ta diferencia di opinion.

Den esaki e aspectonan linguistico no t’e unico cu mester
tene cuenta cu ne, pero tambe esnan politico y economico. Tin manera un
silencio hermetico den e asunto aki y ta rekeri cu mester bin mas transparencia
den e asunto aki.  

Di otro banda nos mester tene bon cuenta cu e
generacionnan cu lo sigui studia den exterior. Na Merca estudionan haci a
comproba cu studiantenan di Caribe, unda conoce e creol-English, tin dificultad
cu e bukinan na Ingles cu ta uza na Universidad. Consecuentemente nan ta haya
nan mes confronta cu hopi problema durante nan estudio. Y tur esaki ta
desperdicio di talento, unabes cu e studiantenan no keda cla na tempo cu nan
estudio pa regresa nan isla pa duna un man.

Na Corsou FPI a haci un investigacion na 2010 bou di
alumnonan di Peter Stuyvesant College, Maria Imaculata Lyceum y Radulphus College
y mayoria di e hobennan ta haya e ortografia fonologico dificil.

LOGRONAN

For di 1976 Bestuurscollege di
Aruba a instala un Spellingscommissie pa despues na 1984 stipula e Ortografia
di Papiamento, mientras pa desaroya material, stimula uzo y proteha Papiamento
a institui na 1986 e ‘Instituto Linguistico Arubano’.

Den e decada di añanan ’80
practicamente mucho no a ser haci riba tereno di enseñanza y a uza e periodo aki
pa prepara pa un siguiente fase. Y asina den añanan ’90 a cuminsa cu diferente
curso di tercer grado di Papiamento, mientras na 2002 a inicia na ‘Instituto
Pedagogico Arubano’ cu esun di dos grado.

Na aña 2000 a keda cla cu e Gramatica
di Papiamento, y na 2003 Papiamento cu su ortografia etymologico a bira e
idioma oficial pa despues a revisa y completa e ortografia na 2005.

E mesun aña di 2003 a cuminsa
cu un curso adicional di Papiamento na nivel di bachelor. Alabes entrante di
augustus 2003 a introduci Papiamento den enseñanza secundario na scolnan di
EPB, MAVO, HAVO
klas 1-2-3, VWO klas
1-2-3, EPI
y  IPA. Desde aña escolar 2015-2016 Papiamento ta ser duna
como materia den e klasnan di HAVO-4, VWO-4 y awendia ta un materia di examen pa
Havo-5 y VWO 6.

Pa duna Papiamento como
materia na scolnan a desaroya e metodo
‘Cristal’.
Asina pues Papiamento ta ser uza den 3e klas como idioma di
instruccion y como materia banda di Hulandes, Spaño y Ingles.

Na 2008 a introduci enseñanza
multi-lingual na dos scol basico como projecto-piloto, pa evalua e resultadonan
y efecto di uzo di Papiamento den enseñanza. Como un di e logronan mas grandi
por considera e introduccion di e Vocabulario Ortografico di Papiamento na
2009, cual actualmente mester ser revisa y agrega mas palabra.

Un ‘Manual di Gramatica di
Papiamento’ (morfologia) a keda introduci na 2010, mientras na 2015 a publica e
‘Manual di Gramatica di Papiamento’ cu ta trata e sintaxis, esta e structura di
un frase.

Un prome grupo a sigui na 2013
un estudio di 4 aña na Universidad di Corsou pa ricibi un grado academico como
docente di Papiamento.

Lamentablemente cu p’esnan
kende a inicia e estudio aki, Ministerio di Enseñanza no a tene cuenta den nan
planning unda tur por incorpora e graduadonan aki, sea ta riba tereno di
enseñanza, maneho, investigacion of management.

CULTURA

Desde añanan ’70 por mira cu cierto tradicion y
celebracionnan cultural, manera Dera Gai y Dandé a bolbe haña bida.  Anualmente e celebracionnan aki ta tuma lugar
y a expande riba nivel di demas bario. A bin algun festival acerca, manera e.o.
e ‘Festival di Canto’ y ‘Festival
di Cancion Tipico’, pero riba nivel di teatro tambe por dedica mas
atencion.

Na Brazil e ‘Fundacion Bernadina Growell’ ta organisa
diferente actividad, cual por sirbi como un ehempel p’e otro  barionan organisa.

Loke ta haci falta den esaki ta investigacion
antropologico-cultural den e barionan, pa por haya sa mas di e forma di biba y
di cierto costumber cu ta caracterisa cada bario.

E proyecto ‘Expedicion Rescate’ ta un bon inicio pa
conduci investigacion di nos historia oral, pero mester enfoca tambe riba
estudionan socio-cultural  cu un base geografico.
Mester traha na un proceso pa cada bario tin su propio identidad, unda esaki ta
keda refleha den e costumber y formanan cultural expresivo. Esaki ta nifica cu
den cada bario mester tin un monumento, caminda nan ta honra nan baluarte.

Apesar di e desaroyonan describi, tin cierto incongruencia
cu mester señala. Si un banda ta duna contenido n’e derecho di autodeterminacion
dor di stimula procesonan cultural den e barionan, cu esaki so e clima-cultural
no ta completo.

Tin un maneho pa monumento y museonan, pero ainda no tin
un trayecto di estudio avanza pa esnan cu ta desea di haci investigacion of
traha riba nivel di management. Of cursonan cortico p’e taxista, empleada di
hotel, guia, touroperator of empleado di museonan cu ta traha cu turista of
esnan local..

E mesun fenomeno por ripara den enseñanza, esta cu a
introduci Papiamento na scol y hasta ta un materia di examen na scol
secundario, pero ainda historia, nos herencia-cultural y literatura Arubiano cu
mester carga e Papiamento no ta un materia na scol.

Despues di Status Aparte diez Gobierno a sinta den e
periodo di 1986-2020 y hopi proyecto a ser entama, sinembargo riba tereno
cultural-educativo por logra mas.

Pa duna realce n’e derecho di autodeterminacion ta spera cu
e Ministerio di Enseñanza sinta na mesa cu e directiva di SMOA y SKOA pa delibera
con ta bay adapta e curriculum y introduci p.e. Historia di Aruba  y Literatura Arubiano como materia y sirbi
como un instrumento pa fortifica identidad di e pueblo.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.