Editorial
Generalmente dia 17 di Maart, ta den cuadro di preparacionnan pa celebracion di e momento cu den e lucha pa Status Aparte, a introduci e simbolonan di e pais autonomo den Reino, cu Aruba kier a bira.
E Himno y Bandera di Aruba, a bira e prueba pa e seriedad di e Arubiano, cu tabata kier a maneha su propio pais a base di su mentalidad y su capacidad.
Awe Aruba ta prepara pa observa e Dia di Himno y Bandera na un forma diferente. E Himno y Bandera ta recorda Aruba riba problemanan enorme cu e pais a sobrevivi den pasado pero tambe riba e hecho cu na e momentonan aki Aruba tin e autonomia pa hiba su propio maneho den un reto grandi.
Ora mañan 18 di Maart anuncia su mes y Aruba mira su bandera y canta su himno, e pais ta bolbe na su balornan mas sagrado den union den cual patriotismo y solidaridad ta bini dilanti.
Aruba como parti di mundo ta pasa den momentonan dificil, cu a afecta e base economico di e pais. Awe e Dia di Himno y Bandera mester aporta na mas animo pa sigui mira futuro.
Medidanan a wordo tuma pa isola Aruba for di e riesgo mundial grandi. Portanan di Aruba a wordo cera pa evita cu mientras no por confronta e coronavirus nobo, COVID-19, cu remedi efectivo y sigur e vacuna pa stop e virus, e entrada di e malesa na Aruba ta keda habri.
Aruba a tuma e paso mas grandi y responsabel cu e por a tuma den un situacion mundial dificil pero no sin promesa di normalisacion despues di tempo.
Cientificonan ta duna aliento pa loke ta trata un vacuna y remedi contra COVID-19, cu awe ta afecta bida normal.
Cu palabranan di animo na nos pueblo, nos bista ta keda dirigi riba e celebracion di Dia di Himno y Bandera na 2021 cu sin duda lo bira un celebracion grandioso di otro triunfo di nos pueblo.
Ta cu fe den nos Creador nos ta drenta Dia di Himno y Bandera cu nos bista riba tur Arubiano y nos dushi tera Aruba. Nos oracion ta pa pronto por reanuda bida diario y sigui traha cu animo riba construccion di un bunita futuro.
Animo nos ta desea Aruba na entrada di Dia di Himno y Bandera.
