Diabierna lo tin vuelo di re-patriacion
ORANJESTAD (AAN): E preocupacion di hopi arubiano cu ta den exterior y colombianonan como tambe turistanan cu ta na Aruba pendiente di nan vuelo na e momentonan aki ta hopi grandi.
Manera DIARIO a duna di conoce, no ta solamente vuelonan pa paisnan manera Colombia, pero hopi otro pais. Tin usuarionan di diferente aerolinea cu ta pendiente wardando cambio den e status di nan vuelo ya sea pasobra esaki a wordo cancela y mester a haci un re-acomodacion den otro vuelonan cu ta disponibel.
DIARIO a haya sa cu Avianca a dicidi di cancela nan vuelonan Aruba-Colombia-Aruba entre e dianan 16 pa 19 di Maart. Pero mientrastanto, e compania mes na Bogota no a emiti un comunicado oficial.
E informacion cu DIARIO a compila ta cu pa diabierna awor, Avianca lo tin un vuelo mainta specialmente pa transporta e personanan cu no ta residente na Aruba y cu mester bay bek nan pais. Lo duna prioridad na e grupo aki pa nan por regresa nan pais. Mescos cu e pasaheronan cu si ta residente of local di Aruba y cu ta pega na Colombia.
Pa loke ta e otro pasaheronan cu tin vuelo pa otro dia, nan vuelo a wordo reschedule. E mihor conseho cu por tin pa nan ta pa keda trankil y no drenta den panico.
Si nan a wordo asigna na un vuelo caba, haci uzo di e vuelo ey pa bin bek Aruba. Esey e mihor situacion cu por tin te cu awor. Ya cu den caso cu ainda no tin vuelo asigna, nan lo tin cu keda warda of paga pa un tarifa mas halto (diferente na esun cu nan a paga inicialmente), pa un lugar disponibel.
E problema ta ora cu e localnan cu tin un vuelo cu ta yega Bogota y e conexion pa Aruba ta te na e siguiente dia. Nan no por bay pasa e anochi den un hotel pasobra nan no ta residente colombiano. Nan lo mester warda den airport mes.
Asina cu tin mas informacion lo trece esaki dilanti. Gobierno di Aruba tambe tin un linea di contacto disponibel pa e arubianonan / residente cu ta pega den exterior: 569-6897.
