ORANJESTAD (AAN): Un situacion cu a pone algun hende den panico, a presenta su mes Dialuna anochi den area di Aeropuerto. Habitantenan por a sinti cu un avion cu motor jet ta bulando y ta draai basta biaha rond di vliegveld, pero ta bulando sin luz di navegacion cendi.
Pero e momento ey, ya caba Aeropuerto di Aruba ta cera. Toch a mira con e avion aki haciendo approach hopi abao, tabata bulando na un distancia basta minimo y esaki posiblemente pa e pilotonan por scout e pista di aterizahe.
Finalmente na ultimo momento, a haci un birada downwind, a cende tur beacon lights y a ateriza na Aruba sin cu a haci comunicacion, y sin cu tin un flight-plan entrega di antemano.
Tanto Charlie-Charlie di Aeropuerto (Security), como tambe Grenspolitie y unidadndn di Polis a yega pa rondona e avion, cu a bay staciona riba su mes sin ningun clase di instruccion net pariba di Gate 1, cu ta e lugar unda mayoria vez KLM ta staciona.
Na prome instante no a acerca e avion, pasobra no ta conoci ki intencion nan tin. Na final nan a habri e trapi y asina e dos pilotonan a baha, y finalmente a pone boei na nan man.
E avion priva aki ta un modelo Hawker Series 800A fabrica na aña 1983. E avion aki ta un Business Jet cu tin dos motor Honeywell. E tin un registro Mericano, esta N834MM. Mayoria di su vuelonan ultimo lunanan a pasa via di Mexico.
No ta conoci di unda e avion aki a yega Aruba, y pakico el a haci esaki den un total ‘radio-silence’, y tambe sin luz cendi. Si acaso su VHF-Air Radio lo a daña, e por pone un squawk special den su radar transponder pa notifica Aeropuertonan cu e tin problema cu comunicacion.
Polis a aresta e pilotonan pa asina haci un investigacion. Despues tambe autoridad di Aeropuerto a lastra e avion aki rumbo pa e otro banda, esta na General Aviation. E speranza ta cu Ministro lo por duna informacion na prensa di kico realmente a socede cu e pilotonan di e Business Jet luhoso aki cu a pone Aruba haya un déjà vu di e tempo di decada di 1990 ora cu ta monton di avion pirata tabata ateriza despues cu nan a caba di haci dropping di droga.
