Epidemiologo Maribelle Tromp
ORANJESTAD (AAN): Epidemiologo Maribelle Tromp a elabora cu prevencion contra COVID-19 ta hopi importante, y mester sigui tur e medidanan cu a wordo tuma di parti di Gobierno, manera nos Minister President a bisa cu mester di distanciamento social, personanan cu no mester sali, bay den cierto camindanan den grupo grandi mester evita esaki.
Purba di ta mas na cas, kiermen si por traha na cas, esaki ta ideal. Si un persona ta traha cu hopi hende, ta esencial pa tuma medidanan di higiena, manera laba man frecuentemente, usa hand sanitizer.
Señora Tromp a bisa cu mester tuma e medidanan aki hopi serio, pa asina evita cu e virus lo sigui placa mas y no yega cerca nos grandinan of gruponan di riesgo, cu si por tin consecuencianan mas serio y hasta fatal.
E coronavirus ta presenta den dos grupo; e grupo di personanan saludable, di edad jong y mucha.
Como tambe e grupo di riesgo, cu ta e grupo di hende di edad y cu ya ta sufri di un malesa. Manera nan ta wak con e malesa aki a manifesta su mes den diferente pais manera Merca, Europa y China, personanan di edad halto, mas di 60 aña y personanan cu ta sufri di malesanan cardiovascular, esnan cu tin un sistema inmune debil, ta e personanan cu coronavirus ta afecta hopi duro, na unda e mortalidad ta hopi halto cerca nan.
Malesanan cardiovascular ta casi un 40 porciento cu no ta sobrevivi e virus aki.
Pa e grupo saludable, e virus aki ta un ‘mild flu’, kiermen esaki por causa un tiki keintura y tosamento, pero pa esnan cu ta den grupo di riesgo halto, nan por haya problema pa hala rosea, y por haya un pulmonia pisa, y pa motibo cu nan ta debil caba, e curpa no ta want’e.
Mirando cu na Aruba, hopi hende tin diferente problemanan di salud, sea nan tin problemanan cardiovascular of otro malesa cronico, ta haci e tratamento mas complica.
E personanan cu ta cay den grupo saludable, mester percura pa no yega cerca e grupo di riesgo, si e virus aki plama rond.
Tur hende mester evita pa e grupo di riesgo no haya coronavirus, ta nos responsabilidad como ciudadano pa percura pa otro y evita cu esaki ta yega cerca nan.
Aruba ta den bon caminda, pasobra cerando fronteranan ta evita cu nos lo haya mas casonan di afo. Berdad tin caso na Aruba, pero e cantidad ta hopi abao ainda, pero nos a contene e fluho di entrada di mas caso.
Señora Tromp ta conseha comunidad pa tuma COVID-19 hopi na serio, esaki no ta un joke, si bo ta malo keda cas, no bay traha.
Haci tur tramite via telefon of email, no mester ta den contacto fisico pa haya ayudo of servicio. Si bo por traha na cas, haci esaki. Nos ta biba den un mundo moderno, cu hende por keda traha na cas mas hopi cu ta posible.
Doñonan di trabao ta bat enfrenta nan mes cu hopi di nan empleadonan ta bay keda cas y por bira malo. Pero no obliga hende pa bin trabao y laga nan traha na cas.
Evita aglomeracion di hende. Sinta un distancia leu di otro persona. Concientiza muchanan pa laba man y no braza ni sunchi ningun hende.
