ORANJESTAD (AAN): Diabierna ultimo Kiwanis Club of Palm Beach hunto cu Sr. Danilo de Freytas, Sales Manager di KLM pa Dutch Caribbean, a entrega e doorprize di KLM gana recien na e Kiwanis Carnaval Masquerade Party.
Manera ta custumber pa varios aña, KLM ta contribui na Carnaval Masquerade Party pa medio di un premio cu ta ensera un round trip pa dos persona di Aruba pa Amsterdam. Kiwanis Club of Palm Beach ta masha agradecido mes na KLM cu ta contribui na comunidad dor di yuda cu e doorprize pa hasi e fiesta aki aun mas grandi.
E ganador di e doorprize di e aña aki a resulta den nomber di Sra. Natasja Gomez. KLM y Kiwanis Club di Palm Beach ta desea Sra. Gomez y su esposo un viahe placentero y pa disfruta di e roundtrip pa Amsterdam.
Riba e potret adhunto por mira e feliz ganadornan hunto cu Sr. De Freitas kende a otorga e premio. Sr. De Freytas a indica cu ta un orguyo pa KLM pa otroga e premio aki y asina aporta na un evento pa recauda fondo caritativo y di e forma aki duna sosten na nos comunidad y especialmente muchanan den necesidad.
Sra. Gomez di su banda a expresa palabranan di gratitud na KLM pa e bunita gesto aki.
