ORANJESTAD (AAN): Riba Dia di Himno y Bandera, ex-Premier Mike Eman, hunto cu su casa Doina a haci un ofrenda floral riba Monumento 18 di Maart, na busto di def. Shon A Eman.
E dia aki cu mester ta un celebracion rond di e isla, pero debi na e ultimo acontecimento di e crisis di Coronavirus, e dia a bay keto y solemne.
Den su discurso Mike Eman a indica pa duna tributo na e firmantenan cu ta e tatanan di nos pais. El a hala atencion ora el a referi na e crisis mundial cu Aruba tambe ta parti di dje.
El a haci un suplica riba union, pa hunto, kitando diferencianan politico, pa mescos cu a sosode ora Lago a cera na 1985, ora a drenta Status Aparte, etc., pa hunto nos supera e momentonan aki.
Eman ta considera cu e crisis actual lo por bira esun di mas pisa den historia di Aruba, cu efecto riba salud publico pero specialmente tambe cu un sla duro na nos turismo y economia.
E ta pidi tambe pa oracion pa supera e crisis, pa tur cu tin reto cu nan trabao awo y sin lubida riba su casa Doina cu awe Diahuebs lo haya su di dos tratamento di kimoterapia.
