ORANJESTAD (AAN): Prome Ministro Allen Chastanet di St. Lucia, a test negativo pa e Coronavirus Covid-19, despues cu el a cuminza haya un tosamento modera, na final di un viahe recien pa Miami pa ricibi asistencia medico.
Ministerio di Salud di e isla di St. Lucia a bisa cu Prome Ministro mes riba propio iniciativa a pone su mes den cuarentena voluntario y a laga un test wordo haci cune.
E resultado a yega bek riba Diamars atardi laat y el a resulta di ta negativo pa Covid-19. Pues ta djis un griep regular el a haya, y su condicion ta stabil.
Ministerio di Salud a bisa cu prome cu nan a haya e resultado, ya caba nan a cuminza cu e proceso rutinario di contact-tracing y cu algun di e famia y contactonan di Prome Ministro a pone nan mes tambe voluntariamente den cuarentena como un precaucion.
Hunto cu e resultado di Prome Ministro, nan a ricibi resultado di e otro pashentnan tambe den isolacion, y nan tur a sali negativo.
