Despues di e fecha aki lo cobra boet
ORANJESTAD (AAN): Vocero di WEB Aruba NV, Asja Dongen a laga sa cu for di November 2019 nan a cuminsa manda carta na tur cliente, a pone informacion riba nan pagina di Facebook, den medionan di comunicacion pa asina prepara y cumpli cu e dos cuentanan cu ta caduca na Maart 2020.
A bisa cu e compania di Utilidad ta compronde cu e ta keda un situacion dificil. Locual nan kier comunica ta cu por paga e di dos cuenta cu ta caduca na Maart cual ta e consumo di februari. Por pag’e tiki tiki pa mas tarda 31 di Mei 2020.
Dongen a adverti cu esey ta e ultimo ‘deadline’ pa loke ta consumo di e cuenta di Februari. Kiermen, e consumo di Januari mester ta paga pero e cuenta di consumo di Maart, April tur eseynan ta keda bin.
Pesey no ta cumbini bo pa bay tarda mucho pa paga esun di Februari. Ta bon pa sa cu tanten cu e deadline di 31 di Mei no yega y bo no a paga e cuenta di Februari, WEB no ta cobra e boet y no tin nodi di bay WEB tampoco pa pidi un areglo di pago ya cu e ta bay automaticamente, e vocero di e compania a splica.
Si paga e cuenta despues di 31 di Mei, e ora si mester cumpli y ta bay cobra boet. Banda di esey ta core e riesgo grandi cu ta desconecta e suministro, a remarca.
