(ADVERTORIAL)
ORANJESTAD – Pasaheronan di Aruba Airlines cu ta pega na Aruba y cu tin cu cu bolbe Corsou of Bonaire, cu no a logra haya lugar ainda diabierna, por biaha diasabra awor. Asina e compania a laga noticiacla.com sa diahuebs merdia. Esaki ta bira e ultimo buelo di e aeroliña por lo pronto debi na e situacion di e coronavirus
E BUELO
E buelo en cuestion ta sali diasabra merdia 12’or y mei pa bay hiba tur hende Bonaire y Corsou. Nan mester ta 10’or y mei diasabra mainta mas tarda na aeropuerto. “Despues di e fecha ey nos no tin fecha mas pa bula Corsou cu Bonaire. No ta bay tin mas buelo” e representante a sigui bisa e portal aki.
GRUPO GRANDI
Tin aparentemente un grupo grandi cu Aruba Airlines ta bay hiba Corsou mayan (diabierna atardi), pero banda di esaki tin hopi hende cu mester bay tambe pero no a localisa nan ainda. Ta parse y sa ta custumber cu e hendenan aki sa warda te ora cu nan buelo original di buelo (p.e. otro siman diadomingo of dialuna) yega, pa nan core puntra kico ta kico. E aeroliña a yama hopi di e pasaheronan pero ainda tin basta cu nan no a logra haya. “Sea nan telefon na Aruba no ta traha, of otro motibo”. Pesey a acudi na prensa pa haci e anuncio aki.
ARUBIANONAN PEGA
Arubianonan pega na Bonaire, e buelo ta sali for di Bonaire diasabra 2’or di merdia, y esnan cu ta pega na Corsou, e buelo ta sali 10 pasa di 3 atardi for di Corsou. Esnan di diasabra pega na Corsou y Bonaire por tuma e buelonan ey. A pidi pa tuma contacto cu Aruba Airlines pa e pasaheronan regla nan asuntonan pa nan no keda atras.
