ORANJESTAD – Aruba ta purba na no yega na e extremo pa tin cu cuminsa duna multa na ciudadanonan cu ta viola e reglanan ‘nobo’ stipula pa gobierno relaciona cu e coronavirus crisis. Por lo menos asina vocero di Departamento di Salud (DVG), Jurette Croes a bisa diahuebs mainta durante conferencia di prensa, contestanto pregunta di noticiacla.com. Na St Maarten mientrasatanto si a impone multa caba pa algo asina, y como tal noticiacla a haci e pregunta aki na e crisisteam y a haya e prome declaracion como contesta, esta cu no ta impone multa ‘ainda’.
REGLA NOBO
Tabata diaranson anochi cu gobierno a impone regla nobo relaciona cu e crisis di coronavirus. Esaki ta encera entre otro cu entrante 19 di maart tur establecimento mester sera 8:00 PM.Esaki ta pa evita aglomeracion di hende. Tin excepcion pa; botica na warda, restaurant solamente via drive true y delivery, nan por sera 10:00 PM. Pompnan di gasoline por keda habri te cu 10:00 PM sirbiendo via di bentana. Gobierno ta urgi tur ciudadano pa tene bon cuenta e cambio aki y pa cumpli cu e reglanan pa asina yuda contene e virus pa e no plama.
CONCIENTISACION
Segun Jurette Croes di DVG, ta purba haci concientisacion suficiente y splica comunidad e indole di e gravedad di e malesa aki. “Ta positivo cu comunidad ta compronde esaki y lo traha hunto pa nos no tin cu yega na e extreme aki” Croes a sigui bisa. Tur anochi ta evalua e situacion y a base di e situacion na Aruba, lo por bay over na extreme aki di impone multa.
