ORANJESTAD – Diabierna proximo Parlamento di Aruba lo trata presupuesto di pais Aruba cuminsando 9’or di mainta. E tratamento mester a tuma lugar for di aña pasa conforme ley, unda cu pa 15 di December di e aña anterior e mester ta aproba y presenta na e colegio di supervision financiero CAft, despues cu esaki keda entrega pa 1 di September pa e gobierno na turno. Pero pa varios motibo, gobierno no a logra haci esaki sino te cu awor. Consecuencia ta cu hopi cos no por a tuma lugar ya cu no tabatin fondonan aproba. Pa ley, mientras cu e presupuesto no ta aproba, por usa solamente 40% di e presupuesto anterior.
KEHO DI CAFT Y HULANDA
For di e colegio di supervision financiero CAft tabatin basta critica recientemente durante nan bisbita na Aruba. Den palabra di e presidente Raymond Gradus, no por tin excusa pa no tin un presupuesto aproba. Y no por usa e pandemia ni eleccion y/of campaña electoral pa bisa cu no por a presenta un presupuesto. “E tempo pa excusa a pasa” Gradus a bisa na e occasion ey tambe. Asina mes a mustra speransa pa Aruba haya su presupuesto aproba rapidamente.
