fbpx
January 26, 2022

A pidi Hof pa ratifica castigo di 10 aña di plan di likidacion

Share on facebook
Share on Facebook
Share on whatsapp
Share on Whatsapp
0
0
A pidi Hof pa ratifica castigo di 10 aña di plan di likidacion
A pidi Hof pa ratifica castigo di 10 aña di plan di likidacion


E dies añanan impone door di Corte di Prome Instancia contra Marco Tromp dia 13 di october 2020, no a cay na su agrado. El a apela esaki pero Procurador General (PG) a pidi Hof pa mantene e mesun castigo contra dje.

Riba e fecha ya menciona, a declar’e culpabel di planeamento di un likidacion, posesion di arma di candela y violacion di ley di droga. Ministerio Publico (OM) a pidi 10 aña y Corte a bay di acuerdo cu esaki.

Durante e razzia na su cas a confisca 1 revolver, 2 pistol y 1 mitrailleur. Tambe a confisca marihuana, cocaina y pildo XTC. A descubri e caso aki ora cu autoridadnan tabatin telefon di Pineiro Ocando getap den un otro caso. Asina a scucha e combersacion entre e persona aki y otro mas riba e plan di likidacion contra K. Richardson. E motibo ta cu un grupo (Bontekoe y Ralphy) lo a horta droga di Richardson, kende a bay busca represalia. Auto di Bontekoe a kima y a destrui su cas y a menasa Ralphy. E ultimo aki a bira menasa Richardson cu su likidacion si e papia di e caso aki cu e hombernan di Corsou.

Momento cu fiscal a yega na e sitio di inval, pa por pone su mes na altura di e caso. A hala atencion cu na e cas a topa cu arma pisa!

Despues di henter e informacion ariba menciona, a haya e datonan di e telefon getap di Pineiro. A papia cu lo suministra Tromp cu Uzi y Sig Sauer. A haya e armanan aki tambe den e container di Tromp durante e razzia. Durante vigilancia inclusive a mira e auto di Ralphy para dilanti cas di Tromp na Madiki. Banda di esaki tin combersacionnan di whattsapp di Tromp cu e persona cu mester a contrata pa likida Richardson.

A detene Richardson 16 di januari 2020, pa cende propiedad di otro hende na candela, destruccion y posesion di arma di candela. A declar’e liber di tur esaki dia 17 di juli 2020.

Tromp ta nenga di a planea un likidacion, no conoce Kevin Richardson, no tabata envolvi den ningun plan pa mata, a papia cu Pineiro solamente riba hendenan cu ta bende marihuana, cu e arma y droga den e container ta di un Venezolano. E unico cos cu ta di dje ta e 20 gram di hennep haya den su tas. El a declara cu e no ta biba den e container pero sa bay eynan pa bishita un amigo of pa huma marihuana. E doño di e container tampoco e no sa unda e ta.

PG a uza como prueba tur loke Fiscal a trece dilanti den Prome Instancia. Tur e grabacionnan den e investigacion, mensahenan di whattsapp y tambe declaracion di testigonan.

Banda di esaki, no ta prome biaha cu Marco Tromp ta dilanti mesa berde. Na 2015 tabata pa posesion di arma di candela y na 2017 pa violacion di ley di droga. P’esey ta haya cu e castigo impone den prome instancia, di dies (10) aña di prizon, ta esun indica y a pidi pa ratifica esaki. Corte Comun di Caribe Hulandes lo pensa y delibera riba e caso y aki algun siman lo dicta un sentencia.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.