fbpx
January 26, 2022

Abogado Arendsz-Marchena: No por condena un persona a base di sospecho

Share on facebook
Share on Facebook
Share on whatsapp
Share on Whatsapp
0
0
Abogado Arendsz-Marchena: No por condena un persona a base di sospecho
Abogado Arendsz-Marchena: No por condena un persona a base di sospecho


Abogado di Marco Tromp, condena na 10 aña pa planea likidacion, posesion di arma di candela y droga, a bisa Hof diamars mainta cu e pregunta central den e caso aki ta: A logra yega na e minimo di prueba pa condena e acusado aki? Pa abogado mr. Zuhaila Arendsz-Marchena, e contesta ta NO.

E abogado a pone hopi enfasis riba e hecho cu ley ta bisa cu ta condena un hende, e prueba mester legal y convincente. Ta tres punto escencial cu OM mester cumpli cu ne pa pidi Corte condena un persona.

Loke ta resalta den e caso aki, segun e abogado, ta cu autoridadnan a basa nan mes unicamente riba declaracion di un solo persona. Y esaki “no ta prueba legal y convincente cu Tromp hunto cu Pineiro Ocando y Nuto a prepara e asesinato di Kevin Richardson.”

Riba e prome punto di planeamento di un asesinato, e abogado ta kere mester declara e acusado liber. Despues di analisa e dossier di e investigacion e ta sinti cu e detayenan di e caso no a wordo bon analisa. Asina por ehempel no tin prueba di apoyo pa e declaracion di Pineiro Ocando cu a uza contra su cliente. “Tin hopi sospecho, pero sospecho no ta mescos cu prueba. “ Asina den e combersacionnan ta papia di un hende di Hulanda cu a manda e ordo y cu lo paga 10 mil euro. Niun caminda por conclui cu Tromp tin algo di haber cu esaki.

Tin hopi papiamento entre Pineiro Ocando y Nuto (Hulanda), pero niun caminda a menciona e nomber di Tromp. Tin un parti di e combersacion riba un tipo di arma, pero no ta papia specificamente di un likidacion. Ta papia cu Tromp a puntra Pineiro Ocando si e ta dispuesto pa likida un persona. Pero e mensahenan aki no ta aparece den e dossier. Pineiro Ocando ta papia di un mini uzi, pero no a haya esaki na e sitio. Cu a haya un of otro arma, esaki no ta prueba cu el a participa den e plan pa likida un persona.

Tin mensahenan cu a wordo manda pa un number di Tromp, for di un telefon di Hulanda. Pero atrobe, Tromp no a reacciona riba ningun di e mensahenan aki. No tin prueba cu e acusado a acerca e tal Nuto riba un likidacion y no tin prueba cu e tabata na altura mes cu tin un likidacion den preparacion. Y cu Pineiro Ocando a wordo contrata pa esaki.

Ta berdad, e Abogado a bisa, cu e declaracion di Pineiro Ocando ta incrimina e acusado Tromp. Pero algun otro prueba di apoyo pa esaki no ta existi. “E dossier ta yen di suposicionnan y sospecho. Pa esakinan atrobe no tin prueba di apoyo. Nada cu por carga e suposicionnan aki. Y corda, sospecho no ta prueba,” e abogado a enfatisa.

A base di e ariba menciona, ta pidi pa declara su cliente liber. Otro luna lo tin sentencia.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.