fbpx
May 28, 2022

Kamperveen a pone pia abou: Dialuna reunion ta publico!

Share on facebook
Share on Facebook
Share on whatsapp
Share on Whatsapp
+1
0
Kamperveen a pone pia abou: Dialuna reunion ta publico!
Kamperveen a pone pia abou: Dialuna reunion ta publico!


E intento di presidente di Parlamento te for di Hulanda, parce di no a funciona aki na Aruba. E griffier suplente di parlamento a sigui ordo di e vice-presidente na mando aki na Aruba y a yama e reunion publico pa dialuna cuminsando for di 9:00 am. Cu esey a cancela e bijeenkomst cu presidente Edgard Vrolijk di MEP a organisa p’e mesun dia. E reunion aki ta sumamente peligroso pa Minister Glenbert Croes y pa existencia di Gabinete Wever-Croes II.

Oposicion ta mira esaki manera un logro grandi, pasobra den e reunion ey di dialuna por presenta mocion, por bin cu amienda y mucho mas. Kisas hasta pasa un mocion di desconfiansa contra Minister Glenbert Croes y si haya sosten di por lo menos un parlamentario di coalicion, e mocion lo pasa y e mandatario lo keda sin trabou!

Fraccion di Raiz a bisa diahuebs ultimo cu MEP tin cu corda cu nan a dovorcia di RED y POR, pues nan no por trata nan pareha nobo, RAIZ, mesun cos manera a trata e dos partnernan chikito. Parlamentario Raymond Kamperveen a uza un idioma pisa pero convincente, cu ta haci halamento atras awo casi imposibel. Den caso cu e hoben politico opta pa no para tras di su palabranan, e ta core chens di perde hopi sosten cu el a ricibi instantaneamente pa e forma con el a para Minister Croes den locual Raiz ta considera un deal dudoso, cuestionabel y cu merece un investigacion!

Pero pa evita cu gobierno ta tambalea y kisas cay dialuna awo, a purba laga presidente Vrolijk maniobra for di tera friu pa purba cambia e reunion di uno publico pa interno. Pero Raiz ta para hunto cu oposicion den esaki, sea e reunion ta publico of sino nada. “Si no tin nad’i sconde, pakico no presenta den un reunion publico anto pa duna pueblo cuenta y rason di con cosnan a bay den e deal aki?”, asina un analista politico a vocifera riba red social awe.

Minister Glenbert Croes ta hay’e den ‘opspraak’ pisa atrobe pa decisionnan y deal cu no ta parce di ta integro, pero sigur no transparente. Por corda cu den pasado gobierno a yega di cay cu ne temp’i partido OLA pa mesun tipo di deal cu zeebrieven y luchtbrieven te cu gobierno di Hulanda a declar’e “no ministeriabel”. E tempo aya ta ex-Minister Presidente mr. Henny Eman a bay bringa p’e te na Hulanda pa despues di hopi luna toch nombr’e como minister. Despues a sigui e investigacion den WEB pa un decision tuma, den cual gobierno di MEP a laga pone beslag pa un suma miyonario riba su salario.

Cualkier hende lo pensa cu, despues di a somete na tanto investigacion y drama politico, cu awe e lo ta mas cauteloso den tumamento di decision. Cu e forma di actua, den cual e ta Minister di Energia y su mesun ruman consehero, Junior Croes, ta presidente di e compania estatal Refineria di Aruba, cu ta parti di e deal cu Eagle LNG y su omo Hendrik Croes ta abogado di Utilities Aruba NV cu tambe ta cay bou su mesun responsabilidad. Sin investiga ainda, cualkier hende por mira si cu di reglanan di integridad y “good corporate governance” nos no por ta papiando aki!

Partido Raiz ta keto ainda riba e desaroyonan aki y a yama un reunion urgente awe diasabra, sperando yegada di lider di fraccion di Raiz den parlamento, Misha Raymond. E reunion lo tuma luga na un sitio discreto y ta te despues di e reunion interno aki lo dicidi ki paso e partido politico lo tuma den parlamento mes y eventualmente den coalicion.

Partido Raiz mes tambe a pasa den su momentonan di reto despues di formacion, ora cu dos candidato prominente a tuma retiro. Un di nan ta Anko Koopmans, cu awendia ta un di e tres candidatonan prominente pa e funcion di director di WEB Aruba NV. No ta conoci awor, bao tur e investigacionnan di integridad den WEB, cu Koopmans lo ta interesa ainda. E ultimo tin un bon imagen den comunidad y a mustra na mas di un ocasion di ta para na e banda integro den tumamento di decision. Su ultimo funcion tabata director di Serlimar.

Share on facebook
Share on Facebook
Share on whatsapp
Share on Whatsapp
+1
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.