fbpx
May 28, 2022

Husticia a opta pa wanta Chris Williams tambe cera

Share on facebook
Share on Facebook
Share on whatsapp
Share on Whatsapp
0
0
Husticia a opta pa wanta Chris Williams tambe cera
Husticia a opta pa wanta Chris Williams tambe cera


Fiscal a saca un ordo awe mainta pa detene Christopher Williams como sospechoso den e caso di bringamento y destruccion na Gusto Nightclub y Azia Restaurant. E ultimo aki ta ruman di Nigel Williams, un otro sospechoso den e caso y alabes e ta yiu di lider di partido Pueblo Prome, Michael Williams. E sospechoso ta pareha tambe di miembro di parlamento, Gerlien Croes di partido AVP. Un rato pasa, 4:20 pm, fiscal a dicici di prolonga su detencion y want’e cera den cel di ward’i polis, te ora cu e investigacion preliminar ta cla.

Chris Williams ta conta cu acesoria legal di abogado mr. Desiree Croes, cu tabata cu ne ora el a entrega su mes merdia na ward’i polis di Noord. E abogado a drenta cu ne pa su prome interogacion pero recherchenan a bisa di lo no keda cla awe y lo sigui den fin di siman pa purba finalisa e proceso mas lihe posibel. Asina mes no por duna ningun garantia cu ningun di e dos sospechosonan lo sali prome cu fin di siman termina. A wanta un cera na Noord y e otro na ward’i polis na Santa Cruz. Williams ta un di e dos sospechosonan cu a entrega nan mes awe y ta encarcela pendiente e interogacionnan.

Awe mainta a sali un ordo di detencion pa dos sospechoso, ambos yiu di lidernan politico. Prome cu merdia a detene Kevin Wever, yiu di lider di MEP y Christopher Williams, yiu di lider di Pueblo Prome. Den ambos caso e sospechosonan mes a yega warda di polis di Noord, compaña pa nan abogado y a entrega nan mes. Den e prome parti aki di e codigo di procedimiento penal, e abogado no tin mucho espacio pa maniobra y mas bien husticia tin e prome dies dianan pa por investiga y purba yega na e berdad di locual a sosode riba diadomingo dia 14 di november ultimo, durante e pelea den baño di Gusto Nightclub entre Nigel Williams y Kevin Wever.

Riba e dia ey esun ta acusa e otro di a coba su mama y scupie. Siguridad di dicho club a saca e bringadonan porta ‘fo mesora. Pero en bes di bay cas, a opta pa e ora bay come den Azia Restaurant y no a dura mucho cu e gang a topa cu otro atrobe. Ey a bolbe tira sla y den e proceso a kibra boter tira den e luga. Polis a detene tres hende caba den e caso aki. Kevin Wever a bay su mañan mes pa entrega keho na polis como victima, pero famia Williams ta insisti cu e ta e autor di henter e problema.

E caso aki a haya mas atencion cu normal pasobra ta trata aki di yiu di e politico Michael Williams di Partido Pueblo Prome y yiu di e mandatario Evelyn Wever-Croes, lider di MEP y alabes minister-president. Ambos ta contrincante pisa di otro den arena politico y ta parce cu e yiunan a opta pa sigui cu mesun ehempel aki, pero riba caya y cu masha agresividad.

Mester menciona cu luna pasa a detene e sua di Kevin Wever, esta Yowalfre Torres-Mendez, cu ta pareha di e yiu muhe di minister-president, Claudine Wever, kende tambe tabata cu Kevin durante e pelea. El a keda cera den cel na ward’i polis for di diabierna te cu diaranson.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.