fbpx
May 28, 2022

Mayornan a start peticion virtual contra tapaboca na scol

Share on facebook
Share on Facebook
Share on whatsapp
Share on Whatsapp
0
0
Mayornan a start peticion virtual contra tapaboca na scol
Mayornan a start peticion virtual contra tapaboca na scol


Mayornan di alumnonan di Colegio Conrado Coronel ta pidi un revision tocante e protocol nobo pa cu muchanan bou di 12 aña, cu ta encera cu e mucha mester bay scol cu tapaboca bisti. Aunke e mayornan kier minimalisa tur contagio di Covid-19, toch nan tin duda cu e protocol aki tin un base cientifico y kisas no ta efectivo.

Prome cu a yega na e conclucion aki, mayornan a bishita diferente fuentenan riba internet, manera World Health Organisation (WHO), Government of the Netherlands y The European Centre for Disease Prevention & Control. Tur ta di opinion cu e bistimento di un tapaboca pa muchanan bou di 12 aña, no mester ta obligatorio y cu mester tene cuenta cu otro factornan cu tin influencia riba e bienestar di e mucha.

WHO ta informa cu e impacto psicosocial y cognitivo riba desaroyo di e mucha door di bisti un tapaboca, mester wordo consulta cu maestronan, mayornan/voogdnan y/of expertonan medico. Gobierno di Hulanda a informa cu muchanan bou di 12 aña no ta rekeri pa ley pa bisti tapaboca. European Centre for Disease Prevention & Control (ECDC) ta indica cu muchanan bou di 12 aña tin un tolerancia mas abou pa bisti tapaboca pa periodonan largo y kisas no lo bisti tapaboca corecto. Ademas ta stroba un mucha pa expresa su mes nonverbal cu ta necesario ainda pa e grupo di muchanan den e edad aki. ECDC ta indica cu distanciamento social, etiketa respiratorio, higiena di labamento di man y keda cas ora mucha ta malo ta medidananan importante independientemente di e uzo di tapaboca. 

E mayornan ta di opinion cu a implementa e protocol aki sin consulta cu e maestronan y mas importante, sin consulta mayornan. Ademas nan kier mira e base cientifico cu bistimento di tapaboca pa muchanan di menos di 12 aña ta efectivo.

Sperando cu pronto lo por tin un revision di e protocol aki of un reunion pa stakeholdernan (maestronan/mayornan/cabesantenan) por vocifera nan inkietudnan. 

Click aki pa yena e peticion.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.