Diamars anochi pa mas o menos 8:15 un grupo di adulto mayor cu ta train baile a topa cu un situacion desagradabel riba Plaza Libertador Betico Croes. Un persona desconoci a laga yen di paña sushi benta, pio ainda a susha e muraya cu pupu. Rond di e luga tabatin saca tambe, pues un desaster total.
Marcia Dirks a conta cu diamars anochi ta nan dia normal di train. Nan ta haya cu esaki no solamente ta algo desagradabel sino tambe un situacion tristo mirando cu e ta considera cu e plaza ta “algo di nos como Aruba”. El a sigui conta cu no ta prome biaha cu esaki ta sosode, varios biaha a yega di topa adicto ambulante ta uza droga. Siman cu a pasa, un grup’i hende a bay n’e plaza pa train y a baha taira di nan auto.
Pa e grupo e tabata un shock pa en bes di train den un ambiente agradabel, yega topa cu luga tur sushi y descuida.
