fbpx
August 13, 2022

Fundacion Ambiente Feliz: Un otro logro importante pa persona cu limitacion multiple

Share on facebook
Share on Facebook
Share on whatsapp
Share on Whatsapp
0
0
Fundacion Ambiente Feliz: Un otro logro importante pa persona cu limitacion multiple
Fundacion Ambiente Feliz: Un otro logro importante pa persona cu limitacion multiple


Fundacion Ambiente Feliz ta creando oportunidad pa esnan cu un limitacion intelectual y multiple na Aruba pa desaroya nan mes teniendo cuenta cu nan nivel cognitivo y social-emocional.  Cu fondo di Sociaal Crisis Plan y Samenwerkende Fondsen e fundacion a realisa e projecto Cas Briyante situa na San Nicolas. E prome fase cu a inicia na september 2021 ta consisti di un 1 woonunit pa esnan entre 6 y 18 aña di edad y un centro pa pasa dia. 

Awe SAF ta sumamente contento di por anuncia un otro logro importante pa persona cu limitacion multiple na Aruba cu ta e di dos woonunit na Cas Briyante pa esnan entre 18 y 55 aña di edad.  E fundacion ta spera cu asina por duna mas oportunidad na esnan cu realmente mester di e ayudo y cu actualmente ta den un situacion insigur y hopi biaha sin perspectiva. 

Pa esnan cu nan miembro di famia a ricibi un lugar den e di dos woonunit na Cas Briyante, e oportunidad aki ta significa hopi. “Mi salud a bai atras y mi no por duna e cuido adecua mas. Awor tin un lugar na Aruba mes cu por ofrece mi nieta e cuido y atencion cu e merece. Asina toch mi por keda envolvi den su cuido mientras ami por traha ariba mi salud personal. Mi ta sinti un alivio grandi cu awor mi nieta lo ta den man di personal cariñoso y profesional”. 

Cu e di dos woonunit e localidad no lo ta funcionando na e capacidad maximo ainda. E retonan pa por cumpli cu fase 3, un woonunit pa esnan cuminsando for di 55 aña di edad, ta mas grandi.  E fundacion lo rekeri mas fondo pa por cumpli cu tur e rekisitonan. E cuido pa esnan cu un limitacion multiple ta costoso. E ta rekeri suficiente personal profesional y material specialisa pa por ofrece e cuido y guia necesario na un nivel individual. Mirando e importancia di e proyecto e fundacion ta spera cu pronto e fondonan necesario lo bira disponibel. 

Stichting Ambiente Feliz ta gradici tur esnan cu nan un of otro manera a yuda realisa e di dos woonunit na Cas Briyante. Tambe e fundacion ta gradici e famianan cu a pone nan confiansa den e fundacion y nos profesionalnan. Awor nan tambe ta forma parti di e famia di Ambiente Feliz. 

Pa por realisa fase 3 y otro proyecto pendiente e fundacion tin necesidad di donacion. Cu ayudo di comunidad  e fundacion por sigui cu e trabou importante y realmente sigui crea oportunidad pa esnan cu tambe ta forma parti di nos comunidad. Si ta desea por hasi un donacion na Stichting Ambiente Feliz, banco CMB, number di cuenta 20906501. Pa mas informacion por tuma contacto libremente na number di telefon 5858738 of via nos email [email protected].  

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.