Diaranson ultimo 24 ora a presenta na e proyecto di expansion di aeropuerto Aruba, Gate 2030, pa un manifestacion cu tabatin dje trahadonan na sitio cu tabata bisa cu no ta pagando nan p’e trabounan cu nan tabata realisando. Segun informe ricibi, despues di esaki, e trahadonan a acudi na departamento di labor y a surgi mas problema ainda.
Segun informacion ricibi, dia 19 di april Bohama a anuncia cu lo retira contratista Esco Garden, di Enrique Esobar, for di e proyecto pa incumplimento di trabou y trece un contratista nobo p’e proyecto en cuestion. Tur esaki sin a avisa e empleadonan tocante nan pago atras di dia di fiesta, vakantie y cesantia p’e culminacion di e contract di 1 aña cu nan a firma na cuminsamento di e proyecto.
Pa dia 20 di april a trece contratista Munaz contractors, pa cua a exigi e empleadonan acepta nan salario pa por tuma contract dibiaha. E empleadonan no a acepta e “abuso” aki y Munaz no a tuma e trabou.
Den tur esaki, dia 22 di april mester a paga e trahadonan y a bin resulta cu no tin placa pa paga nan, ni contratista pa duna cara. Segun a bin compronde, Bohama N.V. cu representante Rene Te Thije no a presenta pa splica kico ta pasando cu e pago dje trahadonan, siendo cu e tabata e persona cu a sigura e trahadonan cu nan lo percura pa nan haya nan pago manera debe ser.
Pa merdia, un contratista a presenta y a informa cu e lo tuma e contract di 41 trahado y lo paga e trahadonan menos salario, ya cu esey ta locual tabata indica den un carta ricibi for di Bohama N.V. Den e carta aki tabata stipula cu tur trahado mester acepta un reduccion di 5 florin for di nan salario, sin cu e trahadonan a bay di acuerdo y sin firma contract cu Bracamonte (contratista nobo).
Awo ta cuestiona si Bohama no tin placa of si gobierno di MEP no ta pagando Bohama N.V. pa e proyecto aki? Mas cu claro, e trahadonan kier claridad riba e preguntanan aki. Pues, ta di cuestiona con un proyecto miyonario di e gobierno, segun e trahadonan, tin tanto problema y no tin placa pa paga e trahadonan debidamente. A pidi pa haci un investigacion di Bohama N.V., ya cu a duna nan e proyecto grandi aki y awo no por responde riba kico ta pasando cu e trahadonan y nan placa.
—
