fbpx
July 05, 2022

Husticia no ta cla cu ne: A prolonga detencion di ex-minister Otmar Oduber

Share on facebook
Share on Facebook
Share on whatsapp
Share on Whatsapp
0
0
Husticia no ta cla cu ne: A prolonga detencion di ex-minister Otmar Oduber
Husticia no ta cla cu ne: A prolonga detencion di ex-minister Otmar Oduber


Hues-comisario a bay di acuerdo cu fiscal di Ministerio Publico, cu tin motibo valido pa prolonga detencion di ex-minister Otmar Oduber cu un maximo di ocho dia mas. Cu e prolongacion aki, e sospechoso lo pasa e weekend aki cera den cel di ward’i polis, pendiente interogacion y dependiendo si lo detene mas sospechoso cu tambe ta envolvi den e investigación Flamingo.

Tabata diamars dia 10 di mei ultimo, cu landsrecherche a detene Otmar Oduber pa 9:30 am ora el a yega nan oficina riba Vondellaan pa un interogacion. Su detencion a bay hopi diferente compara cu di tur otro, cu si nan a detene na nan cas mainta trempan. Otmar Oduber ta ex-Minister di Infrastructura durante Gabinete Wever-Croes I. El a opta pa pidi su retiro na september 2019, asina cu husticia a cuminsa un investigacion penal contra dje. 

Mas sospechoso envolvi

Relaciona cu e desaroyo di e caso, a realisa detencion di Aisha Esser dia 2 di maart ultimo. Pues esaki tabata e prome detencion den caso Flamingo. Dia 11 di maart Esser tabata bek den libertad. 

Dia 7 di maart a detene Fito Croes tambe den e caso di Flamingo. A realisa entrada hudicial na su cas na Kurimiauw y a confisca basta articulo. Despues di un siman, dia 14 di maart, Croes. a sali liber.

Den tur esaki, dia 26 di april 2022 a detene Otmar Oduber su yiu homber, Jeandrick Oduber y a interog’e na oficina di Landsrecherche. Tres dia despues, Jeandrick a recobra su libertad.

CASO FLAMINGO

Dia 24 di juni 2020, Landsrecherche (DLR) a haci varios huiszoeking en cooperacion cu RST (Recherche Samenwerkingsteam) y Cuerpo Policial Aruba y bou guia di hues-comisario. E huiszoekingnan aki tabata den cuadro di un investigacion penal di Landsrecherche tocante posibel delito di corupcion y otro hecho castigabel relaciona cu otorgamento di tereno di gobierno. E investigacion penal aki ta carga e nomber codico ‘Flamingo’.

Procurador General a duna Landsrecherche ordo na september 2019 pa cuminsa e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organisacion. E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019.

Mas concretamente bisa: e investigacion ta dirigi su mes riba e pregunta si un of mas compania a logra obtene incorectamente (un opcion) riba terenonan di erfpacht den e periodo di november 2017 pa december 2019, caminda ta investiga tambe e eventual rol di e minister anterior. Den e huiszoekingnan a confisca documentonan y cargadornan di data. Di awor pa dilanti e team investigativo lo analisa e contenido di e administratie y e computernan cu a wordo tuma den beslag y lo scucha e sospechosonan y testigonan.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.