fbpx
October 01, 2022

Strooimento di shinishi di tres defunto na Seroe Colorado

Share on Facebook
Share on Whatsapp
0
0
Strooimento di shinishi di tres defunto na Seroe Colorado
Strooimento di shinishi di tres defunto na Seroe Colorado
Posted on 06/22/2022 11:17 am AST | Updated on 06/22/2022 11:18 am AST

ORANJESTAD – Diahuebs, dia 23 di juni, 2022, pa 11:30 di mainta, lo tin un ceremonia di strooimento di shinishi di tres defunto. Ta trata di Carl W. Beyer, Sra. Gail Janson-Smith y Sr. Samuel (Sam) Speziale, Jr. Tur tes defunto a nace den hospital di Lago, bay scol y crece den Lago Colony. Esaki lo tuma luga den presencia di famianan, amigonan y invitadonan di e famia cu a bin for di Merca pa e ocasion special aki. 

Segun señor Adolf Kock, debi cu e no tin informacion completo di Gail y Sam, y tambe cu Carl ta mas conoci pa nos, e  por comparti cu e sigueiente storia. Carl su pareha, Cisca Taft y famianan, ta na Aruba caba pa e ceremonia aki. E ceremonia lo tuma luga na e faro na Seroe Colorado, den Colony.

Carl no ta un desconoci aki na Aruba. El a nace aki den e hospital di Lago, yiu di Walter y Maxine Beyer, hendenan di Casper, Wyoming, cu a biba den Lago Colony e tempo ey. Kock a traha cu e tata cu tabata un Maintenance Foreman den Oficina di Light Oils, for di aña 1954 pa 1964. Nos a sera un bunita amistad y nan tabata bishita otro regularmente.  

Carl, despues di a termina su estudio na Merca, a uni su mes den e Cuerpo Policial na Oklahoma. Algo nunca e por a lubida, manera el a conta Kock, tabata e explosion cu Timothy McVeigh a causa dia 19 di April 1995 na e Day Center, cu por poco a causa su bida, pasobra net e tabata yega ey pa un control cu regularmente nan ta haci tur dia.

Increibel con Carl tabata stima Aruba y su hendenan….asina hopi amistad cu durante aña a enrikece su bida. E tabata afortuna pa usa parti di su tempo pa bishita nos isla despues di su pension. Hasta a cumpra un pida tereno na Sero Alejandro cu e meta pa traha su cas y disfruta di su pension aki na nos isla. Pero pa motibo di tempo y salud esaki no a wordo realisa. Kock y su amigonan de Cuba na Savaneta a yud’e na varios ocasion tocante e tereno aki. Un tereno cu a dun’e hopi dolor di cabes entre e y gobierno. Ami mes mester a bay cune na D.O.W. na un ocasion.

Carl, debi na su personalidad saliente, a desaroya algun amistad ferviente riba e isla y a lo largo el a bira parti di nan famia. Su tempo ta bira hopi cortico ora e bishita nos isla debi na e tantisimo amistad cu e tin cu atende.

Carl y Cisca a retira na Cape Coral, Florida unda nan tabata gosando di nan pension. Desafortunadamente Carl a encontra cu algun problema serio cu su salud durante e ultimo seis aña cu a afect’e y a rekeri hopi atencion, pero e no a entrega. E tabatin un actitud positivo y tabata determina cu e mester bira bon, cual sigur a prolonga su bida. Un cos bon tabata cu e no tabata sinti ningun dolor y a gosa su bida te na fin. 

Dia 26 di februari 2021 Carl ta fayece na Cape Coral na edad di 78 aña, lagando su pareha Cisca y yiunan. Dia 6 di November un Celebracion di Bida a wordo teni na Cape Coral, Merca pa su esposa, famia y amigonan. Su deseo semper tabata cu ora e muri, pa su shinishi wordo plama den Lago Colony. Awo su esposa ta cumpli cu su deseo, un persona cu tur esnan cu a conoce sa con hopi e tabata stima e pida baranca aki. Carl tabata bon amigo cu e doñonan di Charlie’s Bar na San Nicolas y durante varios di su bishitanan, e tabata keda cerca nan. E ultimo tempo cu e cu Cisca tabata bini pa un luna, nan tabata keda na Aruba Beach Chalets na Savaneta. 

“Mi ta desea Cisca y tur famia hopi forsa y cu nos amigo Carl sosega na Paz. Igualmente hopi forsa na famia di Gail y Sam. Cu nan sosega na Paz” Sr Kock a finalisa bisando.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.