Minister di integridad ta laba cabes di Otmar Oduber! Unda e filosofia nos no ta nan a keda? Nada no ta asombra mi mas, ta locual Booshi Wever a expresa. Mas bien ta indigna mi inmensamente ora mi wak con constantemente e “octopus” y “scorpion” manera un spirito, a pesar di ta “opgelokt“, den dia cla ta wandro den edificio di Cocolishi y den nos Parlamento, cu hasta berguensa mi tin di skirbi esaki cu un hoofdletter.
Pa hopi tempo mi a keda keto, ya cu mi no ta mira cu nada mas ta bay cambia y cu toch “nobody cares“! Pero asina mes, mi curpa ta cuminsa grima, ora mi sigui mira kico ta sosodiendo y parce cu tur cos ta tapa na un manera nechi, mientras cu financiadonan di campaña ta keda probecha.
Ya caba riba 23 di juni 2021, un aña pasa prome cu eleccion, mi a entrega un di 3 rappel na OM pa loke ta mi keho contra Otmar Oduber den e caso di compra corupto di e incinerator chikito. Na e ocasion aki mi a amplia mi denuncia contra di director di DOW, e ministernan demisionario e tempo ey, esta prome minister (como minister di infrastructura) y minister di finansa, ta declaracion di Wever.
Esaki pasobra, despues cu e compania CTC na 2018, por medio di corupcion di dia cla di ex minister Otmar Oduber, a haya un contrato lucrativo via di un “onderhandse aanbesteding”, nos por a mira cu a base di un argumento fofo di director di DOW, cu na Aruba no tin ningun otro compania of hende cu por opera e incinerator aki, ta conseha minister di infrastructura di e tempo ey, esta prome minister demisionario, net prome cu eleccion, firma un otro contrato lucrativo y miyonario cu e mesun compania CTC, cu no por a ni start e incinerator y ni a cumpli cu su trabou riba Sero Teishi, pa bay handle e incinerator pa DOW. Anto esaki despues cu DOW a kita e mesun incenirator for di SERLIMAR, pasobra nan si lo tabata por a opera esaki. Y djey ta cambia rumbo y ta conseha otro. E director aki ta conoci cu e ta baila na cualkier tono di un minister!
Lamentablemente e minister presidente actual y e tempo ey demisionario, a scohe sin ningun clase di destaho pa regala e compania aki e contracto miyonario.
Na september di 2021, pa ser exacto dia 5, mi pone den un comunicado, cu mi ta spera cu e gobierno nobo, cu tur dia ta papia di integridad, para e “miskoop” corupto aki. Mi a bisa tambe, cu “bira cara pa esaki, mescos cu e consehero principal di Otmar Oduber a haci y ta wordo recompensa cu un posicion clave rond di minister presidente actual, lo nifica cu nada ta bay cambia y cu ta e pueblo di Aruba un biaha mas lo bay paga miyones pa algo cu no ta sirbi, djis pa complace un sponsor di Otmar Oduber”.
Booshi Wever a adverti e minister nobo di partido RAIZ, cu haciendo esaki, e ta forma parti di un gobierno nobo cu TAMBE ta uno NO-INTEGRO!
