fbpx
October 01, 2022

Abogado: Ta AZV mes a manda busca dentista Kawaiah pa bin traha na Aruba

Share on Facebook
Share on Whatsapp
0
0
Abogado: Ta AZV mes a manda busca dentista Kawaiah pa bin traha na Aruba
Abogado: Ta AZV mes a manda busca dentista Kawaiah pa bin traha na Aruba


“E investigacion ta andando ainda y esey ta un di e causanan pakico detencion di mi cliente a wordo prolonga”, asina abogado mr. Benvinda da Sousa a comenta para dilanti edificio di Corte. E abogado ta representa dentista Abdal Kawaiah, kende ta encarcela desde siman pasa, acusa di ta brinda cuido medico di forma ilegal.

“E ta mucho curu ainda. E investigacion no tin mucho dia, kiermen nos no a haya mucho informacion ainda, pero mi cliente ta mantene cu e ta inocente di locual ta sospech’e”, asina e abogado a vocifera. E ta insisti cu su cliente tin su diplomanan, el a studia varios caminda, na Canada, na Merca y na Francia. Es mas, e abogado a sigura cu e dentista aki ta reconoci mundialmente den su ramo. Pio ainda, e ta hasta un miembro activo di e asociacion internacional di ortodontista, e organisacion di Merca y e organisacion di Canada. Riba dje, e ta un orador invita regularmente pa duna lectura, pa siña y duna les na otro ortodontistanan, specialmente den e tecnica moderno cu el a desaroya di sleep apnea.

Abogado di dentista Kawaiah comenta riba e caso

Abogado di dentista Kawaiah comenta riba e caso

Posted by 24ora on Tuesday, June 28, 2022

Riba nos pregunta relaciona cu e tuchtzaak cu tabatin contra dje na Canada, cu si aki na Aruba nan a “overlook” esey ora cu DVG a dun’e licencia pa traha como dentista. E abogado a contesta cu e ta duda cu nan no a tene esey na cuenta pasobra berdad tabatin un caso contra dje na Canada pero hopi aña pasa y un siman despues e por a cuminsa traha bek.

Di otro banda, Abdal Kawaiah tin nuebe aña caba trahando na Aruba y e ta cuestiona con despues di tanto tempo, cu awor numa diripiente ta ripara cu algo no ta cuadra cu su credencialnan. Es mas, e abogado a subraya locual su cliente a bis’e, cu ta AZV mes a pidi Abdal Kawaiah pa bin traha na Aruba nuebe aña pasa. “Kiermen tin cosnan straño y awor cu tin investigacion andando, lo mester bay sali na cla”, segun mr. Benvinda da Sousa.

Locual por a scucha e ultimo siman aki, specialmente di otro dentista, cu ta acusa DVG y AZV di ta practica faboritismo den e ramo di dentista. Riba esaki e abogado a sigura cu e no ta na altura di ningun sorto di faboritismo pa cu e licencia pa Abdal Kawaiah. Locual e sa si ta cu a nenga e licencia (Ministerieele Beschikking) na su cliente pa loke ta e AruBIG. “Mi no sa, mi no por bisa bo pero atrobe, dia cu el a bin traha na Aruba, e tempo ey e no tabata mi cliente, pues mi no por bisa bo cu si tabatin faboritismo of no”, segun abogado Benvinda da Sousa.

Pa loke ta e pashentnan mes cu a keda atras, hopi ta sinti cu nan a keda den un incertidumbre y no sa kico lo pasa cu nan, si lo haya nan placa bek cu nan a paga pa tratamento na e clinica. Riba esaki su abogado defensor a contesta cu “Dokter Kawaiah no kier a stop di atende su pashentnan, el a wordo forsa pa stop di atende su pashentnan. E ta un persona cu semper a traha hopi cuidadoso, cu hopi dedicacion y responsabilidad pa su pashentnan. E pashentnan cu e tin, e kier a caba di haci algun tratamento pa nan por keda cla, pero e no a wordo permiti. Y mi sa, pasobra mi cliente a declara cu e ta hopi preocupa pa e tratamentonan cu e tabata andando y cu el a pidi DVG pa dun’e u siman mas pa termina e tratamentonan y nan a neng’e. El a pidi DVG pa dun’e sikiera tres dia mas pa e finalisa e tratamentonan di mas urgente y nan a neng’e tambe. Ora el a puntra nan kico lo pasa cu su pashentnan, nan a contest’e cu esey no ta bo problema”, segun e abogado a relata dilanti edificio di Corte.

Pa loke ta e rumornan cu Abdal Kawaiah tabata preparando pa bandona Aruba, e abogado a contradeci cu esey ta un impresion eroneo. El a splica cu su cliente a biaha y nan a bis’e cu e mester regresa pa atende cu su pashentnan. Pues cu e no tabata scondiendo pa ningun hende.

Finalmente abogado da Sousa a bisa cu pa awor no por haci mucho den e prome dies dianan, pasobra ta prerogativa di fiscal si un sospechoso ta keda cera of no. Ta te ora kier pidi prolongacion despues di dies dia, lo por bringa e caso dilanti un hues. Locual el a bisa si ta cu e no ta sigur cu ora e dentista sali, cu si e lo kier sigui traha na Aruba. E trato cu e ta hayando, e forma con a deten’e y encarcel’e, no ta laga espacio pa tin gana pa sigui traha na un isla unda no ta aprecia bo.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.