Recientemente fraccion di MAS a pidi pa un reunion riba e caso di DIMAS, pero te fecha di awe no a yama esey. Presidente di parlamento a sali afo splica cu supuestamente e no por yama e reunion aki cu minister Glenbert Croes, pasobra tin un caso andando y e no por splica. Pero e biaha aki e parlamentarionan a tende di Algemene Rekenkamer riba FASE y e parti cuadro legal.
drs. Marisol Lopez-Tromp, parlamentario di MAS, a indica cu esey no ta corecto pasobra ta keda n’e minister kico e ta splica den parlamento. Ta tarea di e presidente di parlamento pa yama e reunion, e tin di facilita e reunionnan aki. Ta keda na e minister kico y con hopi e ta bay splica. No por bisa di antemano cu un minister no ta bin parlamento. El a hasta tuma ehempel tempo di Serlimar, cu Lopez-Tromp no kier a presenta na parlamento of pasobra tabata tin caso andando.
E parlamentario a indica cu tabata un caso completamente diferente c’un compania failliet y cu investigacion tabata tumando luga. Sinembargo, su persona si a presenta na parlamento y splica den e sala unda tur miembro di parlamento tabata presente, cu director, etc. riba e situacion.
Algemene Rekenkamer tabata presente den parlamento awe pa un rapport cu a sali poco tempo ey. E rapport aki no ta desconoci y a circula. E ta un investigacion con e ayudo di FASE a bay aki na Aruba. Den e rapport aki ta investiga si tin un base legal, di cual a resulta no tabatin un base pa duna e placa aki. Segun e parlamentario, ta trata di un suma di 97.1 miyon florin y ta pueblo a aporta na esaki for di solidarismo.
Awo a resulta cu no solamente tabatin un base legal, nan no por garantisa tampoco cu nan a pone cierto garantia pa no tin mal uzo, pa no tin abuso dje fondonan aki. No tin claridad cu ki criteria a parti e placa. Segun e rapport aki, nan no a tene cuenta cu si tin hende a perde trabou ful, si hende a perde parcial, of si hende a bay un tiki atras. Nan a duna tur hende mesun cos sin evalua debidamente ken di berdad tabatin necesidad.
Pa mas lesa TREMPAN.COM.
