fbpx
October 01, 2022

Parlamentario Vallejo a reacciona na Marsman: “Esey ta djis mi estilo”

Share on Facebook
Share on Whatsapp
+1
0
Parlamentario Vallejo a reacciona na Marsman: “Esey ta djis mi estilo”
Parlamentario Vallejo a reacciona na Marsman: “Esey ta djis mi estilo”


Tras e denuncia publico haci dilanti di parlamento di parti di dentista Marsman, parlamentario dentista Arthur Vallejo tambe a sali di e edificio pa duna su reaccion na miembronan di prensa. E declaracion tabata uno cu e politico hoben a lesa for di e papel su dilanti den loke tabata un texto cu por wel di tabata titula: “Ami”.

Pa esunnan cu no a mir’e ainda, cu a perde un pida of cu kier repas’e, e ta bisa textualmente:

“Ami no ta haci negoshi cu salud di hende.

Ami no tin contacto activo cu e departamento dental di AZV pa añas. Mi a acerca e departamento dental di AZV na varios ocasion den pasado. Increibel, pero berdad, no por a logra establece e practica di kaakchirurgie pa Aruba via di AZV. Dus sigur mi no ta kere mi ta un faborito den e departamento dental di AZV. Ami no tin ningun contacto cu AZV.

Ami no a firma pa introduci pa firma e ley di AruBIG. Minister di Salubridad y Minister di Husticia a firma pa introduci e ley di AruBIG. Por cierto Gobernador tambe mester firma. Ami a colabora den aspectonan clave den e ultimo reformanan di ley di AruBIG, pero mi no a traha ful e ley cu tur su detaye y resolucion.

Ami ta kere y lo pusha pa e lista di universidadnan permiti den e ley di AruBIG di Colombia wordo amplia. Mi ta kere profundamente den esey. Mi no ta controla e lista aki. E unico persona cu lo por agrega nomber di universidad ta Minister di Salubridad. No ta mi persona.

Ami no tin control di decisionnan diario di DVG. Ami no tin control di decision tuma a diario den AZV. Si lo ta asina mi lo a haya un contracto pa traha cu AZV hopi aña pasa.

Ami no tin control den e decision tuma diario den IVA. Mi ta kere cu nan ta haciendo un excelente trabou pa trece ordo, garantisa calidad y siguridad di pashent na Aruba den tur ramo di salud.

Mi por manda pregunta por escrito na minister pa trece claridad riba asuntonan di interes. Ami por puntra minister y si tin mester yam’e den sala di Parlamento pa atende cu situacionnan cu nos ta kere ta importante pa mehora. Sigur esey ta mi trabou, pero na final ta minister ta tuma decision den su posicion ehecutivo. Ami no ta tuma decision pa minister di salubridad. Ami por controla informacion, number y datos, pero na final minister ta tuma decision ehecutivo.

Ami ta respeta e institucionnan aki. Sigur lo haya critica di mi persona ora mi ta sinti cu tin cosnan cu no ta canando e caminda corecto y lo busca pa haya informacion y lo pidi cooperacion di gobierno pa coregi si tin mester.

Ami no ta un persona conflictivo. Ami no ta persigui personanan, menos mi colega dentista. Ami no ta sensacionalista. Ami ta purba di mantene etica semper y mantene na codigo di conducta.

Ami no tin un compleho mental di obsesion compulsivo. Ami no tin problema cu control di rabia. Ami no ta envidia mi prohimo. Ami ta sinti alegria ora otro haya oportunidad of triunfa den bida. Ami ta duna otro oportunidad.

Mi ta consciente cu mi a nace den un famia privilegia y lo duna otro oportunidad pa uza mi cosnan pa nan tambe bay dilanti den bida. Sigur mi no lo probecha y haci negoshi cu nan debilidad of situacion.

Esey ta djis mi estilo. Ami ta biba y laga otro biba.

Share on Facebook
Share on Whatsapp
+1
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.